La nestre identitât cjapade a scufiots

DJ Tubet al è une persone speciâl che jo o cognòs di tancj agns e che al gjolt de stime di miârs di furlans parcè che al dopre la marilenghe in maniere creative, messedantle cui ritmis e lis lenghis dal rest dal mont. La “Patrie” e à simpri vualmât cun atenzion la sô cariere, che lu à puartât a incrosâ tancj gjenars diferents (rap, dub, reggae), intune sperimentazion di lengaçs che no je mai finide. Tai agns al è deventât, cun studi e preparazion che si zontin a un talent mostri, il simbul di une culture vierte, moderne, orientade al avignî: al lavore cui fantats e cu lis scuelis in progjets su la educazion ae culture plurilengâl, e al è pardabon un dai oms plui nets e coerents che il Friûl di vuê al pues mostrâ al mont. Purpûr, fâ musiche in lenghe di minorance e vuadagnâsi di vivi cun chest nol è facil: ma lui al rive, parcè che al è un om plen di ideis e di voie di fâ, che si fonde suntune lidrîs furlane e soredut suntun ideâl di pâs e amicizie che al lee i popui intune prospetive di cognossince vicendevule dulà che dutis lis identitâts a vegnin rispietadis e nissune dineade.
◆ Pe anagrafe dal Stât talian, il DJ si clame Mauro Tubetti: e al à in comun il so cognon cu la senatore Francesca Tubetti, che e je stade elete intes listis blocadis di Fratelli d’Italia. Magari cussì no, cun Mauro e somee vê pocjis afinitâts: anzit, e mostre di vê une vision contrarie di ce che al vûl dî coltâ une tiere che e nas plene di diversitâts. Par jê, lis diferencis a van platadis, parcè che a imbastardissin la raze. Pocjis setemanis indaûr, intal spirt di GO2025, capitâl europeane de culture transfrontaliere, la Societât Filologjiche e veve domandât di segnâ il Municipi di Gurize cuntun cartel in cuatri lenghis: talian, furlan, sloven e todesc. Al è za cussì pal consei regjonâl a Triest e pal consei provinciâl di Gurize. Ma pe senatore meloniane cheste propueste no va tignude in nissune considerazion parcè che “e va cuintri la italianitât di Gurize”.
◆ Si trate di une considerazion che e mostre un grant vueit, su diviers nivei: un vueit di cognossince, stant che la “onorevule” no sa nuie de storie di une citât dulà che par mil agns si son feveladis cuatri lenghis, e la ultime rivade e je propit chê taliane; un vueit di prospetive, stant che GO2025 e varès di jessi une iniziative che e va in direzion di une valorizazion dal pluralisim, e no de “autarchie”; un vueit di rispiet, parcè che il Stât che e rapresente al è fat ancje di chês “minorancis” come chê furlane che jê e mostre di dispreseâ e di no ricognossi inte lôr dignitât.
◆ Nol conte se chescj vueits a son personâi o, come che al plui probabil, ispirâts di une filosofie di partît clare: il fat al è che ai furlans in Parlament in chest moment ur coventarès plui un Tubet plen di ideis che une Tubete che si fâs puartevôs dal vueit. La nestre sperance e je che la senatore che nus rapresente e studii la nestre storie e e capissi la sô complessitât: nol è mai masse tart par fânus corezi il judizi, soredut considerant che lis feminis chenti a àn simpri cirût di custodî la identitât plurâl de nestre tiere e di coltâ une culture di pâs. Pal moment, dut câs, o vin di rindisi cont che ogni dì si scuen fâ i conts cuntune identitât furlane che e ven cjapade a patafs, e no di cumò: par esempli, la Regjon e veve imprometût che ancje la nestre marilenghe e sarès stade lenghe uficiâl di GO2025, ma al è sot voli di ducj che Gurize e je vuê plui “defurlanizade” di simpri. E se no si inacuarzìn di chest, i scufiots a laran indenant… ❚