Dai 14 ai 22 di Jugn une grande fieste
cun musiciscj e liutârs di dut il mont
Il festival di musiche tal bosc, chel de Val ‘Saisare indulà che al cres il peç di risonance, len preseât pe costruzion di une vore di struments musicâi che a son sunâts ator pal mont, al fâs dîs agns. E al è pront par festezâ chest inovâl a cifre taronde cuntune edizion pardabon speciâl.
◆ Risonanze Festival, tal comun di Malborghet Valbrune, inte Valcjanâl, direzût dal pont di viste artistic dal clavicembalist e impresari culturâl Alberto Busettini, al conte in cartelon, do sabide ai 14 fint a domenie ai 22 di Jugn, une vore di apontaments, passe trente, tra concierts, ativitâts tal aiar viert, spassizadis tematichis, visitis vuidadis, mostris, degustazions in musiche, cunvignis, provis viertis, lezions conciert e artiscj in residence. “Suns dal mont” al è il titul programatic di cheste edizion, e cun buine reson, parcè che i musiciscj invidâts, soliscj, formazions di cjamare, orchestris, e i esperts artesans, cembalârs, liutârs, creadôrs di struments, a vegnin di lûcs diviers, par creâ un leam fuart tra Europe, Asie e Americhe.
◆ «O ai vût il plasê di preparâ une edizion aniversari une vore particolâr – nus dîs Busettini -, pai tancj afezionâts che di agns nus stan daûr, ma ancje par chei che a vivin in chescj lûcs. Dut par puartâ un toc di mont a celebrâ cun nô il nestri festival, la nestre nature. A saran zornadis cun tante musiche e iniziativis buinis di tignî dongje diviersis culturis». Il sindic di Malborghet Valbrune, Boris Preschern, al conte di une «sintonie di pinsîr perfete che e pee i organizadôrs e la direzion artistiche dal festival, che e permet di presentâ une decime edizion di Risonanze che nus jemple di braùre, dant acet a liutârs e musiciscj di dut il mont inte nestre tiere».
◆ E no dome ospits di dut il mont, ma ancje musiche di divignince diferente: di chê antighe, ae classiche, romantiche, contemporanie, al tango, al flamenco, al country e bluegrass, ae musiche mariachi, ae improvisazion, scjavaçant secui e latitudins cun musiciscj e grups che a vegnin dal Friûl, de Italie, Cravuazie, Spagne, Andalusie, Singapor, Persie, Messic, Ecuador, Bolivie, Perù e Stâts Unîts.
◆ Sul sît www.risonanzefestival.com, e su lis pagjinis Facebook e Instagram, si cjate dut ce che al covente savût, cu la pussibilitât di prenotâ i concierts, ducj a jentrade libare, che si tignaran tra il Palaç Venezian, la Glesie de Visitazion di Marie e Sant Antoni in place, e dilunc lis stradis di Malborghet, e clâr ancje in Val ‘Saisare, tal bosc di risonance.
◆ Il grant cartelon si divît tra events anticipadôrs, i concierts, il format “Len e musiche”, in colaborazion cun “Legno Vivo” promovût di “Musicae: Distretto Culturale del Pianoforte”, cu la direzion artistiche di Davide Fregona, “Taste the music”, ven a stâi “Cerce la musiche”, cun cinc apontaments tra dibatits, confronts tra musiciscj, esperts e cercis di prodots locâi, tra gustâ e bevi, in rêt cul Hotel Hammerack di Malborghet e il ristorant Valle Verde di Tarvis, e lis ativitâts tal viert ae scuvierte dai tesaurs naturâi insiemi cui musiciscj. Dut chest insiorât di mostris, esposizions e dimostrazions pratichis, cun chê di dâ valôr a chel grant patrimoni naturâl de Valcjanâl che al permet la creazion di struments musicâi che a son il svant de liutarie tal mont.
◆ Tra i ospits, inte dificoltât di nomenâju ducj, e je sigûr di ricuardâ la Red Dot Baroque, une famose orchestre di Singapor direzude di Alan Choo, che e regalarà diviers moments di musiche alte, a partî dai 13 di Jugn e dilunc dut il festival, tra provis viertis e concierts, cu la partecipazion ancje de sopran, tra lis plui amiradis des sôs bandis, Teng Xiang Ting. E je ancje la Orchestre di Zovins Filarmonics Furlans, insiemi ae soliste al sitar indian Giulia Coschiera e ae scjaladore Nives Meroi che a contarà, tra musiche sielte, un viaç apassionant des Alps al Himalaya. Spazi ancje ae Argjentine cul TriesTango, e ae musiche americane cun Massimo Gatti, Ruben Minuto e i Ancient Tones, e inmò musiche messicane mariachi cul grup La Bamba, e il flamenco cui Duendarte, e tancj events plens di sugjestion, come il conciert di miezegnot di sabide ai 14 di Jugn cul violoncelist di innomine Massimo Raccanelli Zaborra.
◆ Nol mancjarà l’armonicist furlan Paolo Forte, il pianist italocravuat Mattias Antonio Glavinic, e lezions dimostrativis cul violinist Giacomo Catana, il virtuôs persian Fuad Ahmadvand ae scuvierte dal santur, il sunadôr di tambûr Stefano Principini, il baile flamenco di Marta Roverato e la ghitare di Antonia Sibio, il pianist “fûr di puest”, un personaç dut di scuvierzi, Paolo Zanarella, il duduk di Abel Arshakian, la violiniste Brenda Koh e une schirie di esperts costrutôrs di struments musicâi che a animaran lis viis di Malborghet cun dimostrazions e lezions viertis.
◆ Une grande fieste al Festival Risonanze, cui sunôrs e la int dal mont, une esperience uniche indulà che la nature e je musiche. ❚