La passion di Valentina pes âfs e pal Cjanâl di Incjaroi

Cheste Cheste volte o sin intal Cjanâl di Incjaroi, cun precision te frazion di Cjaulis di Paulâr, indulà che la zovine Valentina Cacitti di un pôcs di agns e à metût in pîts la sô aziende agricule.
◆ “Dut al è tacât cussì – e conte Valentina – gno nono bis (il pari di mê none) di Cjaulis al veve fat une cjase pes âfs di modons su trê bandis come che si use in Slovenie – probabil che lis vedi viodudis lant ator; jo no lu ai cognossût ma mi àn dit che al gjestive la situazion un pôc cussì. Tai agns ‘80 a son rivadis lis malatiis e lui nol veve lis competencis justis e lis âfs a son ladis pierdudis. A son però restâts il ricuart e la struture che si intant si doprave par altris ativitâts. Il fradi di mê none al à simpri vût cheste passion di tignî lis âfs achì dongje. Un an al à puartât dongje une piçule famee di âfs e par un pôc lis à tignudis intal puest indulà che lis veve gno nono bis. Une dì al è lât a cjolis ma no jere inmò gnot e un grum di âfs a son restadis difûr. La dì dopo in chel puest al jere plen di âfs. Jo mi soi dite che al ere un pecjât che a fossin ladis pierdudis, alore o ai rot un poc lis scjatis a mê mari e a gno pari (o jeri al ultin an des superiôrs – uns dîs agns fa). Gno pari mi à comprât un boç e o vin provât a metilis adun cussì, ae buine. O jerin cence tutis e no us dîs trops becons che o ai cjapât! Dopo o vin clamât un apicultôr che al veve esperience e al à viodût che lis âfs no vevin la regjine e che a saressin stadis destinadis a murî. L’an dopo chel om mi à puartât une famee di âfs gnove e piçule e mi à dit: “Se ti vivin, al pues deventâ il to lavôr; se no ti vivin… no stâ insisti, nol è pan pai tiei dincj. Pe apiculture o tu âs passion o se di no, lasse stâ.” Fuarte di chestis peraulis che mi son restadis tal cjâf, mi soi informade, o ai cjolt libris, mi soi confrontade cul consorzi dai apicultôrs e o ai studiât chest mont, sedi l’aspiet burocratic che ancje chel pratic. La maniere che di lavorâ cu lis âfs e je studiade di tancj agns e a son cierts pilastris che si scuen savê. Cussì di une famee a son deventadis dôs, di dôs a trê e v.i. Plui indevant tal timp, il fradi di mê none, che al tignive lis âfs ae vecje maniere, al è muart e mê agne e à volût lassâmi in ereditât lis fameis che al veve lui. Cussì, par une storie o par chê altre, il numar des âfs al è cressût: no us dîs che al devente une droghe, ma cuasi!”
◆ Intant di dut chest, Valentina e à finît lis scuelis superiôrs, e à fat la universitât e e je deventade agronome; vuê e lavore in chest cjamp e, adun cun sô mari, e puarte indevant la sô aziende.
◆ Ae domande “Trops bôçs âstu?” Valentina e dîs: “E je simpri une domande un pôc complicade intal mont de apiculture. Nol è come in agriculture, là che tu puedis dî di vê 5 vacjis. O varai 50-60 bôçs cirche, ma une dì se une e je plui debile tu zontis un altre… al dipent dal moment. A Cjaulis e a Val di Darte o ai pôcs nuclis. Ind’ ai un pôcs in mont a Valdaiar, par vie dal presidi Slow Food ‘mîl di alte mont’, a Trep di Cjargne, a Zui e a Nimis (par fâ mîl di agace). Il laboratori lu ai in cjase ancjemò par pôc parcè che o ai comedât un puest indulà che o larai a stâ.
◆ La mîl le vent soredut par telefon e si pues cjatâ intune buteghe a Cedarcjis di Darte. Lant daûr des stagjons o fâs mîl di mil rosis di mont o di cuote alte (par solit si fâs simpri), inte plane al è di agace e cjastinâr, dopo le fâs ancje di tei e di aiar e ogni tant in mont o rivi a fâ la melade di peç.”
◆ Valentina e je une produtore ricognossude dal Presidi Slow Food dal arc alpin talian di mîl di mont. “Cheste mîl – e continue Valentina – e je fate di essencis che si cjatin dai 1200 metris di altece insù. O sin un grup di produtôrs di mont che a puartin lis âfs adalt. A metât stagjon o cercin la mîl insiemi cui esperts/judiçs a nivel talian e cussì o rivìn a capî ce prodots che o vin pes mans. Si valute se chê mîl si pues cjapâ dentri o no tal presidi di mont alte. Se al è un bon prodot, lu vendìn dome in vasuts di mieç chilo a un presit plui alt pal fat che, par esempli, la rose di mont (Rhododendron) no florìs ogni an. In mont al è plui frêt e par chest lis âfs a zirin di mancul, si scuen lâ a puartâlis sul puest, insome al è dut un lavôr daûr. Mi è sucedût ancje di lâ in mont a palâ 1,70 metris di nêf intai bôçs… però si fâs.
◆ Intai ultins agns la cjame burocratiche e je deventade avonde pesante. Par esempli: tu varessis di fâ un sfuei rose par movi une regjine cun 5 âfs… une robe di no crodi, parcè che cuant che tu lavoris cun lôr nol è che tu stâs a fâ cjartis a ogni pît alçât. O vin un jutori, ven a stâi il Consorzi dai Apicultôrs che al è avonde atent a chestis robis e ti da une man, par esempli la anagrafe le tegnin lôr e al è come vê une vacje: tu scuegnis declarâ i prodots che tu dopris, jo o dopri ducj trataments naturâi. Al è comut jessi in mont parcè che l’ambient al è inmò net di tancj fatôrs che a puedin dâ fastidi aes âfs; clâr che tu âs dut un altri clime che al pues jessi a to pro o cuintri. Ogni tant al capite di fâ plui mîl in mont che in planure parcè che lis floriduris a son plui sprolungjadis e a son plui varietâts di rosis. In mont tal clime frêt lis âfs no zirin plui di tant e tu riscjis parcè che al è plui facil che a muerin di fam.”
◆ Valentina e je une zovine semplice e cuintri corint, e dopre dome Whatsapp: “Il gno probleme nol è vendi la mîl, ma rivâ a fâle. La int e pues vignî a viodi cemût che o lavori tal apiari; mi dâ une vore di fastidi cui che, sentât devant di une tastiere, al scrîf robis che nancje al sa. No ai ni timp, ni voie di stâ daûr ae int. Jo o vîf benissim istès cence jessi social.” ❚