Vonde monadis! Pe informazion par furlan in Rai no son plui scusis

Di une bande, 150 Comuns furlans e i lôr sindics che a reclamin cun fuarce un dirit fondamentâl: di chê altre il Stât talian, che cuntune man al scrîf leçs che lu tutelin, cun chê altre al robe i bêçs dal canon Rai cence sigurâ a mieç milion di personis il servizi public che al coventarès. Ma cumò vonde!
◆ Al è par chest che i prins citadins dai 150 paîs dal Friûl che si son dâts dongje inte Aclif (Assemblee de Comunitât Linguistiche Furlane) a àn cjapade su cjarte e pene e a àn scrite une letare formâl ae presidente dal consei taliane Giorgia Meloni. In maniere sclete e clare, a non dai citadins de plui part di cheste regjon, a àn domandât “che e vegni sigurade la realizazion di un telegjornâl e di un radiogjornâl in marilenghe”. E che chest al vegni fat “cu lis risors che la Rai e à za”, cence che la Regjon o cualsisedi altri ent a vedin di zontâ bêçs che i contribuents furlans zaromai a àn paiât di sachete.
◆ I sindics a pandin intal document une richieste precise, e si declarin ancje disponibii a lâ jù a Rome par inlustrâ la situazion che e je pardabon paradossâl. Difat pe prime volte il Plan pes Testadis gjornalistichis regjonâls valit pai agns dal 2025 al 2030 al ricognòs neri su blanc la necessitât di rispuindi aes domandis de utence furlane di potenziâ la ufierte informative in marilenghe.
◆ Al bastarès fâ ce che al è scrit su chel document, ma cuant che fevele di Rai lis robis si ingredein cence remission. E alore chest al è il moment just par dî al Guvier “Vonde monadis!”: i furlans no vuelin plui jessi menâts pal boro, ma a àn bisugne che la dignitât de lôr lenghe e sedi pardabon rispietade. Il servizi public al à di rispuindi a cheste clamade, e no son plui scusis. Par masse timp l’aiar al à menât vie dutis lis peraulis pandudis par domandâ cun creance ce che al varès di jessi naturâl e scontât. I dirigents Rai a àn fat il cuc pa no paiâ dazi, ma se la presidente Meloni e je a cjâf dal Guvier che al firme il contrat di servizi cu la Rai, i tocje a je e ai siei ministris di sigurâ che ce che al è scrit su la cjarte al vegni atuât ancje inte realtât.
◆ Za cumò la estension a 40 oris par setemane di television e 150 di radio e dute di garantî, si ben che e je stade slargjade une vore rispet al nuie di prin. Dut câs un telegjornâl di 4-5 minûts in dì su Rai3bis e un gjornâl radio par furlan a daressin justizie a une minorance di 600 mîl personis, la nestre, che no gjolt di un dirit fondamentâl: un dirit che al ven invezit sigurât ai slovens, ai todescs, ma ancje ai ladins, che in fat di numars a son dîs voltis di mancul dai furlans.
◆ Il president de Aclif Daniele Sergon al à fidance inte atenzion de Meloni. “Al sarès un fuart segnâl di atenzion per salvavuardie di dutis lis lenghis di minorance, no fasint distinzions jenfri comunitâts di serie A e di serie B. Pardabon scoltâ i sindics furlans – al siere – al volarès dî vê voe di rispietâ chel mosaic culturâl e identitari che al fonde la Italie”. No fâlu, al sarès imperdonabil. Sperìn che la Regjon e dedi supuart a cheste richieste, ma no dome cu lis cjacaris come che al è sucedût cun Go2025 dulà che il furlan al è stât “spaçât” come lenghe uficiâl ma invezit al è une fantasime in ducj i documents e i materiâi istituzionâi. ❚