PROMOVÛT DAL COMUN DI CORMONS, ASSOCIAZION AMÎS DA MONT QUARINE, AGJENZIE REGJONÂL PE LENGHE FURLANE (ARLEF), SOCIETÂT FILOLOGJICHE FURLANE, IN COLABORAZION CUN ASSOCIAZION CULTURÂL BISIACHE, QUDU LIBRI E CUL PATROCINI DAL COMUN DI BRDA.
◆ Di Dolfo Zorzut a Italo Calvino: scrituris cence confin.
Chest al è il titul de edizion numar nûf dal Premi Leterari Bienâl dedicât a Dolfo Zorzut, scritôr cormonês che al à elet tant che sô lenghe predilete il furlan e che al à dedicât la sô vite ae racuelte di liendis e flabis de nestre tradizion. Dolfo Zorzut al è stât un dai esponents culturâi plui grancj tra Votcent e Nûfcent, student dal famôs Staatsgymnasium di Gurize (Hans Kitzmüller, Lo Staatsgymnasium di Gorizia. Braitan, 2021) che al à acetât tra i siei bancs tancj fantats che si son fats cognossi a nivel internazionâl, contribuint a disvilupâ il tiessût culturâl di Gurize.
In graciis dal prof. Eraldo Sgubin, fondadôr de associazion che e scrîf, cognossidôr profont de storie e de lenghe furlane e ideadôr di chest premi, o sin contents di presentâ cheste edizion impuartante dal bant. Di fat, in graciis de tesi di lauree di Giorgio Morsut, un fantat di Tierç, o vin imparât dal leam tra Italo Calvino e Dolfo Zorzut. Il prin al à cjapât in man ben cinc contis di Zorzut par ripuartâlis tes “Fiabe italiane” e al à disvilupât il concet di flabe tant cjare ancje a Zorzut, a ben che cun spirt e impostazions diferentis. Cun di plui, cheste edizion e presente une novitât dedicade al teatri, parcè che o vin pensât che il miôr scrit al podarès deventâ une leture seniche.
◆ Il bant al è in lenghe taliane, furlane, slovene, todescje e par dialet graisan e bisiac, al à une sezion di narative, une di poesie, une dedicade ai students e, come che o vin anticipât, une part speciâl dedicade al teatri.
◆ Chest premi, forsit ancjemò pôc cognossût, al è la rapresentazion perfete dal spirt Mitteleuropean di GO2025, parcè che al riclame il ricuart di une Gurize là che si fevelavin ogni dì plui lenghis e si augurìn che al entusiasmi lis personis, come che nus à entusiasmât nô.
◆ Scjadince dal bant: 31/12/2025 ❚
