La plui grande bataie dal om furlan: scombati par fâ la spese cence dismenteâ ce che al covente

Fabula fertur: l’Homo Furlanus nol va mai vulintîr a fâ la spese, soredut intal contest alimentâr o in chel dai prodots par netâ la cjase. Piês cun piês il repart “cure dal cuarp”. In feramente, li dal fari, li dal piastrelist o intal consorzi agrari, chel sì. Ma no stait a pretindi che al poi il so pît intun supermarcjât, o in farmacie. E se al ves propit di scugnî lâ, lu fâs sburtant di malegracie il biroç, cu la femine che e cor cun buine ande jenfri lis scansiis cjapant su, a man sigure, dut ce che i covente, dal moment che dome jê e cognòs il bon, il just e il “di bant”. E magari cussì no, il “di bant” al è simpri il plui intrigant pal Homo furlanus di medole masculine. Cussì ogni tant lui al bute il voli su prodots che i plasaressin, ma baste une voglade “de parone” che, sbassant il cjâf, al tire dret, magari cuntune ponte di malinconie pe ocasion pierdude. Benon. Cheste e je la liende metropolitane. Ma la veretât e je ben lontane de narazion. A part il fat che simpri plui zovins, intes cubiis dal dì di vuê, si cjapin no dome l’impegn ma ancje il gust di curâ insiemi lis provisions pe cuotidianitât de famee, e al è biel viodi lui e jê che si spartissin i dovês studiant la topografie de buteghe e curant ae perfezion la racuelte cuntune tatiche degne di incursôrs in azion. E pûr, ancje la tradizion nus conte une storie che ancjemò une volte e fâs contradizion cul mût di pensâ comun. La veretât e je che l’Homo Furlanus si fâs di simpri apassionâ de perlustrazion dal teritori di cjace e di racuelte, fin dai timps plui antîcs. Al sucedeve sigûr, inte Ete des tumbaris e dai cjastelîrs, che oms e feminis e lessin intai boscs e intes largjuris a cjace e a cjapâ sù jerbis, lidrîs, semencis, foncs, poiant tramais par cjapâ jeurs, sghiratis o lant a cirî la olme dal cierf o dal cenglâr. Bon, disìn che cumò nol covente fâ tante fature par puartâ in taule une sportute di robe buine par meti dongje il gustâ o la cene, o ancjemò miôr fa florî la taule de fieste. E forsit ancje par chest, soredut intai ultins agns, si sta madressint une sensibilitât particolâr par discuvierzi e duncje frecuentâ, in particolâr intal cjamp dal gustâ, chês buteghis che a prometin di tornâ tal plat la specialitât dal paîs là che si cjatin. Ognidun, cu la esperience, si è fate une mape topografiche in detai, segnade cun grande passion e insiorade an par an, cul contribût dal passe peraule scambiât dome che cui amîs plui fidâts e di buine fede. L’aspiet plui interessant di dute cheste ricercje al è il fat che nol va a sodisfâ dome une esigjence alimentâr, ma e cjape pluitost il profîl de sperimentazion antropologjiche sul cjamp, come che a disaressin chei “brâfs”. Si dîs che l’Uman, a diference di chei altris animâi, al fâs l’amôr e al mangje doprant plui il so cjâf che no dut il rest. E cussì, tal plat, al à voie di meti dentri paisaçs, memorie, emozion, ricuarts, cognossincis. E no dome: ma ancje art, bielece, storie, identitât. E alore, se intai agns Setante la grande novitât e jere chê di bandonà lis buteghis di paîs par cjatâ dut ce che e podeve coventâ intai super o iper marcjâts, poiâts dilunc i stradons de grande viabilitât, sot lis luminariis dai centris comerciâi cence cûr e cence anime, scjafoiâts intal gorc di ciment e di asfalt di un trafic cence remission di pecjât, cumò, par une sorte di mutazion o miôr di cjapade di cussience, si torne a cirî il savôr particolâr, il gust di une volte, il savê di une preparazion che no si le cjate dapardut, ma dome là, in chel puest alì, sot di chê monta, su la riviere di chel flum. E in chest, bisugne dîlu, l’Homo Furlanus al sta deventant un campion e un esempli, metint insiemi la braùre che e nas dal savê, dal cognossi e dal concuistâ. Ancje parcè che dute la strade fate par stiçâ il sens di apartignince a chê comunitât che si use clamâle Popul e sta tacant a produsi risultâts intrigants, no dome te riscuvierte di lenghe e di civiltât, ma ancje di gust e di gustâ. E cussì si spitichisi a cjatâ la latarie là che il formadi al ven fat daûr de tradizion, o la cantine indulà che a van indenant a fâ polsâ intal len vins vignûts fûr di vignâi cuasi discomparîts. Par no fevelâ des becjariis – e a ‘nd è simpri di plui atentis e passionadis! – che a tornin a proponi ricetis di une volte, tocs di cjâr che aromai nissun al domandave plui, parcè che la mode e la globalizazion a vevin scancelade parfin la memorie di ce che son i crafuts, o lis marcundelis, o il barbonçâl. La passion de ricercje e puarte cun se par fuarce il movisi, ven a stâi il metisi par strade, nasâ, provâ, sperimentâ, ma ancje studiâ e preparâsi. L’apetit si colore duncje di dute chê maravee che par solit e nas ogni volte che si sintìn cuasi discuvierzidôrs di alc che nissun, prime di noaltris, al veve sperimentât. Par no fevelâ de grande sodisfazion, dopo fate la concuiste, di vierzi la puarte dal tinel e regalâ ai ospits une emozion di condividi ducj insiemi. Magari e reste une biele ilusion, ma sigûr che e je avonde par cuinçâ il tocj che si imbandìs pai amîs. In cheste “Grant Cheste” iniziatiche e sauride a podaressin provâ a imagjinâsi un gustâ de fieste, che al partìs de jentrade e al finìs cul dolç. Par chest o soi lât a fâ la spese par voaltris. O tacarès cuntun plat di mindriculis come che lis preparin a Viluce di Ruvigne: la cjar e je rosade, profumade di chel aiar bon, cuntune ponte di salvadi che al ven jù de Mont di Muris. Lis compagnarin cuntun Tocai fresc di cantine (no rivarai mai a clamâlu cuntun altri non!) vignût sù in tiere di Morene. Par fâus cerçâ i Blecs di sarasin, taiâts come une volte, o soi lât fin in Val Tramontine, dulà che us ai ancje cjolt un vasut di “ont”, par cuinçâju, compagn di chel che al faseve mê agne. Nol covente nuie altri, cussì si esalte il savôr de paste. Plat fuart? Inte becjarie di Tamau mi soi fat meti in bande un schultar intîr: la spale dal purcit, fumade e tenare, dome di scjaldâle a lens, un bocon che al va jù cetant ben cu lis patatis di Godie. Picolit Neri, vecjo di cualchi an, di Borc d’Amplian, al è l’ideâl. Come dolç une Gubane des Valadis, artesanâl, umide e ben farside, di inneâle cul sligoviz come che lu preparin lôr: va ben ogni for di Muost (Puint di San Quarin) insù, de bande dal Mataiûr. Pal sligoviz il consei al è chel di domandâ a cualchi contadin. Puartait alc in cambi, il barat al vinç simpri, jenfri galantoms. E se e je vere che “la bocje no je strache se no sa di vacje”, alore permetêtmi di puartâus di Frisanc un plat di formadis che a son deventâts vecjos intal Landri, come che si faseve dîs mil agns indaûr. Cuntune buine tace di Ramandul di Ramandul (!) us fasaran cjantâ in compagnie, plens di ligrie. ❚