Tierce Pontade
Il Friûl trascurât e snobât dal cine talian. Ignorade la sô lenghe – ce aial fat e ce àno fat i furlans? A àn fat di bessôi, come che a son usâts di simpri. E cussì intal 1988 e nas la Mostre dal Cine Furlan cu la intenzion di promovi une produzion audiovisive in lenghe furlane che ancjemò no esisteve. E chel pôc che al jere stât fat, al vignive ignorât. Al jere un concors cun scjadince bienâl, che si alternave cuntun concors paralêl par senegjaturis in lenghe furlane. La mostre e je lade indevant fintremai al 2009, cuant che e je confluide intal Festival dal Cine European tes Lenghis Mancul Pandudis. Nol è plui un concors, ma une vetrine dal cine furlan intal contest des lenghis minoritariis a nivel european.
◆ Cun di plui, jenfri il 2002 e il 2015 e je stade vive la riviste a scjadince anuâl Segnâi di lûs, scrite dute par furlan, che si ocupave, ancje chê, di cine intes lenghis minoritariis. A son jessûts cuindis numars.
◆ Segnalìn cualchi titul fra chei plui significatîfs (sielte opinabile, si capìs).
◆ Prime di sere di Lauro Pittini, 1993 – 90’. Film gjavât fûr dal romanç omonim di Carlo Sgorlon, version par furlan di Il vento nel vigneto.
◆ Lidrîs cuadrade di trê di Lorenzo Bianchini, 2001- 90′. Un horror ambientât intai soteranis dal ITI Malignani di Udin.
◆ Buris, libars di scugnî vignî di Massimo Garlatti-Costa, 2001- 38′. Une comedie su fonts erotic. Il titul al simiote la racuelte di poesiis dal poete cjargnel de emigrazion Lenart Zanier (1935-2017), Libars di scugnî lâ.
◆ Friûl, viaç te storie, di Massimo Garlatti-Costa, 2004- 35′.
◆ Nûfcent, videosclesis dal Friûl, 2004 e 2006-100’ in dut, di Dorino Minigutti.
◆ La Fradaie dai teracîrs e mosaiciscj furlans inte Americhe dal Nord di Irene Rubini, 2006- 43′. Cheste stesse regjiste e torne a proponi il stes titul intal 2008 (45’), movint la sô indagjin su la Europe.
◆ Farcadice, diari di viaç, Charleroi, Belgjiche di Carlo Della Vedova e Luca Peresson, 2006 – 36′
Di chei stes autôrs intal 2007 stes titul, ma il viaç cheste volte al è a Umkomaas, in Sud Afriche e po, intal 2008 a Toronto in Canadà (dutis destinazions de emigrazion furlane).
◆ Missus, di Massimo Garlatti Costa, 2017- 72’. La storie dal moviment dai predis di Glesie furlane che di cuarante agns incà e sparnice culture furlane e e scombat a pro de liturgjie par furlan.
◆ Menocchio di Alberto Fasulo, 2018 – 103’. Pelicule su la figure dal mulinâr Domenico Scandella (1532 – 1599) vivût intal Cjanâl de Ciline e muart brusât tant che eretic. Straordenarie figure di inteligjenton autodidate, indagade ancje di Carlo Ginzuburg, in Il formaggio e i vermi (1976). Il film al fâs fevelâ i personaçs intes lôr lenghis origjinâls, duncje variantis venitis e furlanis.
◆ Predis, la nazione negata di Massimo Garlatti Costa, 2019, 63’. Documentari su la figure di trê predis (Josef Marchet, Checo Placerean e Antoni Beline) che a àn contestât lis istituzions statâls e ancje eclesiastichis indiferentis aes cuistions de culture e de lenghe dal popul furlan.
◆ In-canto di Marco D’Agostini, 2019 – 58’, su la figure di pre Gjibert Pressacco, studiôs de tradizion musicâl sacre furlane.
◆ Viaç tal Patriarcjât di Aquilee, di Marco D’Agostini, 2021 – 50’, excursus storic su la nassite, la evoluzion e la fin dal Patriarcjât di Aquilee, che al à vude paronade la vite in Friûl no dome dal pont di viste religjôs, ma ancje aministratîf e politic dal 1077 fintremai al 1420, cuant e scomençà la dominazion de Serenissime Republiche di Vignesie.
◆ Pozzis – Samarcanda di Stefano Giacomuzzi, 2021- 86’. Film on the road jenfri la localitât di Pocis, piçule frazion dal comun di Verzegnis e la citât de Asie centrâl, li che e rivave la vie de sede (in dì di vuê in Uzbekistan).
◆ No si pues lassâ in bande la serie Felici, ma furlans di Alessandro Di Pauli e Tommaso Pecile – 11 pontadis vignudis fûr fra il 2010 e il 2014 (si puedis cjatâ ancje in rêt) – ni la comedie sureâl Friûl Revolution di Marco D’Agostini, jessude in dôs seriis fra il 2015 e il 2016, par une durade in totâl di 198’.
◆ E no si puedin nancje dismenteâ i documentaris par furlan di Vigji Dal Piçul che si cjatin su YouTube (baste cirî Luigi Del Piccolo e magari notâsi al so canâl). ❚
Al continue intal prossim numar.
