Il gjornalist di Cormons, muart ai prins dal mês di Març, al è stât saludât cuntune partecipazion e un corot gjenerâl di no crodi. Dut meretât par chel che al à fat in agns di cariere professionâl
Al 5 di març dal 2025, nus à lassâts Bruno Pizzul, il gjornalist furlan che, par tancj agns, al à contât, pe television publiche, il balon talian, massime lis partidis de Nazionâl taliane, i Mondiâi, i Europeans e lis manifestazions principâls indulà che a jerin impegnâts i “Azzurri” e lis miôr scuadris talianis.
◆ Forsit nol jere mai sucedût che la peraule furlane plui cognossude e doprade, il salût “mandi” al sedi stât dit par television, scrit intai gjornâl e publicât sui social networks tant come inte zornade cuant che ducj a àn savût de sô muart.
Il “mandi Bruno” al è stât sintût urbi et orbi.
◆ Al è pôc ce dî: Bruno Pizzul al è stât une icone dal gjornalisim. Al à zirât il mont, simpri cu la sô ande di furlan che al saveve vivi cul ecuilibri e il sintiment di un che al jere cressût a Cormons, intal Cuei, un paîs di tradizions contadinis e di amôr pal lavôr e pe vite.
◆ Nol menave la machine: mai cjapade la patente. E jere simpri la siore Marie, la sô femine, a menâlu ator, fintremai intai ultins timps.
Esempli di furlan che al à tignût simpri salde la leande cu la sô Patrie. Cun Enzo Bearzot e Dino Zoff al è stât chel che, plui di ducj che altris, al rapresentave il Friûl intal mont dal balon talian.
◆ Al jere un di famee: al jere Bruno par ducj. E, dispès, i scjampave cualchi peraule in marilenghe, un “mandi”, une sustade al Udin cuant che al zuiave par television, che al faseve vignî simpatie fûr dal Friûl e al faseve braurôs i furlans “di ca da la Aghe”.
◆ Bruno al jere il gjornalist che, contant un Milan cuintri l’Udin, intal mieç dai agns Novante, par television, si sintive che al tignive il so spirt professionâl, sclet e dret, cence sgherlifs, pûr se ogni tant i scjampave un compliment pai blancs e neris: impussibil no volêi ben a une persone come lui.
◆ La gnove de muart di Bruno Pizzul e à puartât un ingropament gjenerâl di no crodi. Sportîfs, gjornaliscj, politics, imprenditôrs, int normâl di dutis lis etâts: ducj a àn dit alc par ricuardâlu e par ringraciâlu di dut ce che al à rapresentât inte culture popolâr dai ultins cuarante agns almancul.
◆ In di di vuê al è plen di telecroniscj, di int che e matee cun microfons e telecjamaris par contâ partidis. Si pues dî che a son ducj nevôts di Bruno e, dut câs, nissun al rive a messedâ cetante competence tecniche dal balon, cognossince dai timps de fevelade, sens dal ecuilibri intal jessi argomentadôr e gjestion de misure dialetiche.
◆ Nol à mai contât une vitorie de Italie in television. Al è lât dongje almancul dôs voltis. Intal 1994, pal campionât mondiâl intai Stâts Unîts, cuant che Roberto Baggio al à trat in curve il rigôr decisîf vie pe finâl cuintri il Brasîl. Chel an, te prime partide dal campionât, tal Giants Stadium di New York, e vignì fûr une scrite: “Bruno, mole il bevi!”. E la siore Marie, di bot: “Bruno, ancje achì ti cognossino?“. E jù, ducj a ridi.
◆ E nuie intal 2000, ai campionâts europeans, cuant che i “Azzurri” dal comissari tecnic Dino Zoff, in Olande, a pierderin la finâl cuintri la France, cul famôs golden goal di David Trezeguet. Delusions sportivis, dut câs esperiencis che a àn puartât la vôs di Bruno in dutis lis cjasis, pardabon.
“Tu mancjarâs a ducj – al à dit propit Roberto Baggio, il plui fuart dai zuiadôrs protagoniscj des telecronichis di Bruno Pizzul – la tô vôs e rivocarà par simpri“.
Al à reson il Divin Codino: Bruno nus mancjarà. Pûr se al è facil che, pensant a lui, il pinsîr al sedi chel di un amì che, prime o dopo, o tornarìn a cjatâ par fevelâ di balon, di Friûl e – parcè di no? – dal Zîr di Italie di ciclisim, che al passarà propit par Cormons ai 24 di Mai dal 2025: une tape dedicade a Bruno, che al lave ator di bessôl dome in biciclete.
E cuntun spagnolet e un tai di Tocai simpri dongje.
Mandi Bruno! ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::::
Une vite dedicade al sport e al balon.
Prime come zuiadôr e daspò come gjornalist. Al è stât ancje insegnant
Bruno Pizzul al jere nassût a Udin ai 8 di Març dal 1938. Al è stât un gjornalist e comentadôr sportîf e prime vôs des partidis de scuadre nazionâl taliane di balon pe Rai, massime dal 1986 al 2002. Di frutut, al veve scomençât a zuiâ di balon cu la Cormonese, la scuadre dal so paîs.
◆ I plaseve simpri contâ che la passion pal balon i vignì fûr cuant che il plevan di Cormons di chei agns, don Cocolin (futûr arcivescul di Gurize), al veve tirât fûr une bale par fâ zuiâ i zovenuts che si cjatavin intal oratori dal paîs sot de mont Cuarine. Il sport al jere util par smamî tensions intai agns de vuere mondiâl e, massime, in chel des scorsadis dai soldâts jugoslâfs di Tito.
◆ Di zovin e di student al provà a lâ indenant tal mistîr dal balonîr, cjapant la lauree in jurisprudence e fasint ancje l’insegnant dongje Gurize, a San Lurinç.
◆ Di zuiadôr professionist, te part di centricjampist, al è stât a Catanie, Ischie e al à zuiât ancje intal Udin, intai agns Sessante. Po dopo, par un probleme par un probleme a un zenoli al à scugnût molâ.
◆ Intal 1969, lu cjolerin a vore chei de RAI dopo vê partecipât al concors nazionâl pai comentadôrs radiotelevisîfs viert a ducj i zovins diplomâts dal Friûl-Vignesie Julie. Ai 8 di Avrîl dal 1970 al comentà la sô prime partide: Juventus – Bologne, une gare di eliminazion de Cope Italie. Al è di ridi a pensâ che, in chê prime ocasion, Bruno al rivà cuntun cuart di ore di intart: al scomençà a comentâ chê partide dal minût 16 indenant. Ben par lui e par ducj che la trasmission e lave in onde in diferide e Bruno al rivà a metile a puest dopo finide.
◆ Simpri pe Rai, al à mateât in trasmissions storichis come “La Domenica Sportiva”, “90° minuto” e “Quelli che il calcio”. Al à comentât cinc Copis dal mont, cuatri Campionâts Europeans, dutis lis partidis di cualificazion pe Cope dal mont e pal Campionât European, fûr che la finâl dal tierç puest di Italia ’90 (comentât di Giorgio Martino, viodût l’impegn di Pizzul di comentâ la finâl Gjermanie – Argjentine la dì dopo). La ultime partide che al à comentât pe Italie, che e à segnât ancje il so cungjò ae Rai, e je stade le gare amichevule zuiade a Triest, indulà che la Italie e à pierdût 1-0 cuintri la Slovenie. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::
IL DISASTRI DAL HEYSEL E IL DISPLASÊ PAR UNE TRAGJEDIE DI NO CRODI
Ai 29 di Mai dal 1985 Bruno Pizzul al jere il comentadôr televisîf pe finâl de Cope dai Campions fra Juventus e Liverpool, cognossude pal disastri di Heysel. In chê serade disgraciade a muririn 39 personis, 32 di lôr talianis e plui di 600 a forin feridis.
◆ “Nol è plui pussibil fevelâ di sport”, al disè Bruno, dopo vê viodût ce che al jere sucedût te tribune dal stadi, vignude jù cun dute la int, scliçade cence pussibilitât di salvâsi.
◆ Centenârs di personis, sot di un mûr di int che e sburtave cence savê ce fâ. Dut in direte mondiâl. Pizzul al è rivât a parâ il colp, cuntune umanitât e une ande professionâl che a àn contât cetant ben la bontât e l’ecuilibri de persone che al jere.
◆ Bruno al veve zuiât di balon di zovin e al veve une passion di no crodi par chest sport. E ducj chei che lu àn cognossût e lu àn sintût fevelâ di chê tragjedie a san ben cun trope malinconie al ricuardave l’episodi.
◆ Di bot, cualchidun, ancje cualchi om politic, par vê voie di jessi par fuarce bastiancontrari, lu à ancje criticât, disint che nol veve di continuâ a contâ une partide che, pûr impuartante, a no veve plui significât sportîf.
◆ “La UEFA (l’organisim che al gjestìs il balon european, ndr) mi à comunicât il numar uficiâl dai muarts – lis peraulis in direte di Bruno Pizzul, cu lis lagrimis intai voi – al è une robe di sgrisulâsi, di no crodi. Dut par une partide di balon. Nol pues jessi cussì”.
◆ Al à scugnût lâ indenant cu la telecroniche parcè che cussì i vevin domandât di fâ, par sparagnâ altris problemis. E, dut câs, intai agns plui indenant, chê sere le à simpri vude iniment cun cetant aviliment. ❚