Sîts impuartants pe biodiversitât e di conservâ
(seconde part)
I risultâts dal studi ripuartâts inte prime part dal articul a àn evidenziât la impuartance dal paisaç rurâl tradizionâl che al permet une plui grande variabilitât e abondance di speciis di uciei. Chest fatôr al è plui evident a Soclêf cui “rescj” de vegjetazion di rive dilunc il percors di roiis che une volte a passavin pe campagne e di vecjos pomârs.
◆ Al è stât ancje evidenziât un declin di grande part des speciis tipichis di ambients rurâi che, istès, in cierts câs a mantegnin numars significatîfs: chest al è plui evident a Cjavaç.
Duncje, in struc, al somearès che, pûr intune situazion no favorevule pes zonis agriculis, lis comunitâts di uciei a tegnin bot avonde ben.
In realtât, buine part dai risultâts positîfs a son dovûts al fat che lis dôs campagnis indagadis a son fra lis miôr des nestris monts (che si viodi la prime part dal articul) e al covente un incuadrament di caratar gjenerâl.
◆ Dai agns Cincuante dal secul passât lis zonis agriculis alpinis a àn vût, pai motîfs ripuartâts inte prime part dal articul, ma ancje par altris, par esempli lis plantisions di peç Picea abies, un grant ridimensionament e une diminuzion di complessitât struturâl e funzionâl. Chest al à puartât une pierdite di habitat e di idoneitât pes speciis animâls, cun consecuencis in cierts câs dramatichis: comprensoris intîrs a son lâts pierdûts o a son stâts comprometûts pai fins di jessi doprâts des speciis tipichis di zonis rurâls.
◆ Cun dut achest, il sisteme residui di areis agriculis al permet la vite, ancje su lis Alps Cjargnelis, a diviersis speciis, che a son sparidis o che a son raris in altris zonis, graciis ae permanence di elements carateristics des campagnis di un timp, dal nivel plui bas di sostancis chimichis ae presince plui basse di speciis esotichis.
Se confrontadis cu lis zonis di planure dulà che la agriculture e je plui intensive e al esist un mût diferent di doprâ il teren, lis campagnis di mont a son plui dongje di chês de Europe orientâl, là che il declin al è stât plui bas e i uciei di ambients rurâi a àn mantignût popolazions plui consistentis.
◆ Dal confront cun studis fats in ecosistemis agricui di planure, al salte fûr che a Soclêf e a Cjavaç il numar di speciis di uciei al è paragonabil o plui grant. Chest risultât al à ancjemò plui impuartance se si ten in considerazion che i studis di confront a son stâts fats agns indaûr (cuant che intes campagnis cjargnelis a jerin ancjemò plui speciis di cumò), pe plui part cun metodologjiis che a permetin une rilevabilitât plui grande des speciis e a son stâts puartâts indevant su superficiis une vore plui grandis.
◆ Ce che al è a pene stât ripuartât al dimostre, ancjemò une volte, che lis afermazions fatis par mostrâ che in planure al è simpri di plui che in mont (che si viodi la prime part dal articul dulà che al è ripuartât che stant al sintî comun la plui grande ricjece di speciis a son intes planuris) a son di dimostrâ cun studis e no cun peraulis. L’autôr, indagant la realtât cun metodis sientifics, al à dimostrât plui voltis il valôr da realtât cuintri chel des peraulis. Chest al è impuartant par capî che cuant che e ven minimizade la necessitât di intervignî a pro dal ambient in zonis di mont – parcè che il probleme al tocje, intal sintî comun, dome o cuasi, la planure – al va verificât e no cjapât par bon.
◆ Cemût che o vin viodût inte prime part dal articul, cualchidune des speciis cjatadis e je fra chês che a son prioritariis pe Union Europeane, e altris a son in declin in mût declarât. Par chest la conservazion di ambients idoniis e no framentâts e à di jessi une prioritât par evitâ la pierdite di ambients peculiârs e di speciis che a vivin dentri di chei. A proposit di chest, o vin bielzà marcât la impuartance dai elements riferibii a un ambient rurâl tradizionâl, ma a esistin dificoltâts pal lôr mantigniment. Di fat, par vie di une gjestion des areis agriculis simpri plui orientade al cumierç e no al ûs familiâr preminent (ancje par vie di contribûts varis dâts fûr “a ploie”), dai efiets dal cambiament dal clime e dai events meteorologjics estremis peâts a di chel – che a àn ancje scravaçât arbui vecjos – lis campagnis a stan lant simpri plui viers une biculture (prâts e sorc o coltivazions similis). Intal studi chest al è risultât clâr massime a Cjavaç, là che al è risultât evident che i uciei di bosc a àn pussibilitâts une vore plui piçulis che no a Soclêf. In plui dai arbui, si scuen considerâ il rûl fondamentâl che a àn lis cisis intal mantigniment de biodiversitât: chestis no varessin mai di mancjâ intun ambient agricul e ancje intal scandai fat in Cjargne, la lôr impuartance e je dimostrade.
◆ Lis necessitâts di conservâ lis zonis rurâls e di mantegni il plui pussibil un ambient leât a chel tradizionâl cun carateristichis che a permetin di conservâ un bon nivel struturâl e funzionâl dai ecosistemis agricui al va, però, cuintri a ce che al ven fat par solit. Di fat, la brame di urbanizazion, insiemi ae disponibilitât di fonts pal cussì clamât “disvilup rurâl” e la insensibilitât viers lis problematichis ambientâls a riscjin di distruzi in pôc timp chel che al reste dai ecosistemis agricui alpins, cuntune pierdite une vore pesante di biodiversitât e di areis disponibilis par agriculture, turisim, ricreazion e ativitâts culturâls. Chest al capite massime intai fonts des vals plui idonis ae realizazion di oparis e infrastruturis, parcè che a son tal plan e dongje dai aglomerâts urbans plui grancj.
◆ La insensibilitât par chestis problematichis, che se no si risolvin a metaran in zenoglon no dome lis comunitâts di chei altris animâi, ma ancje chês umanis di mont, adun cu la mancjance di percezion de realtât e cu la supierbie, su la fonde ancje dal puest che une persone e ocupe – o, miôr, che e pense di ocupâ – intal mont, a son dimostradis di dôs propuestis che timp indaûr a son saltadis fûr e che a tocjavin propit Cjavaç. La prime e jere chê di ocupâ la plane dal paîs cuntun aeropuart, par che i “facoltôs” imprenditôrs de Cjargne a podessin lâ dapardut partint “di cjase”. La seconde e jere chê di fermâ il spopolament de Cjargne urbanizant dute la plane di Cjavaç. Pensâ di distruzi un ambient a fuarte valence agricule, culturâl, residuâl, ambientâl e fondamentâl pe biodiversitât de mont furlane incressint tal stes moment incuinament (di dutis lis fatis), contrascj sociâi (par esempli fra cui che al pues e nol pues doprâ il sît) intune aree – la Cjargne – dulà che sigûr nol è un volum di afârs tant grant par vê un aeropuart, e cuntun risi fuart che pôc dopo de realizazion de opare dut al vadi in bufule – ancje pe insostignibilitât economiche – al vûl dî vê scûr intal cjâf. Pensâ, cun di plui, di fermâ il spopolament de mont, dulà che plui de metât des abitazions e je vueide, fasint centenârs di gnûfs fabricâts e concentrant la int in sostance te zone ator di Tumieç, al vûl dî o no cognossi la mont o, se cui che al fâs la propueste al è de mont, jessi cui pinsîrs dentri de fumate, propit come cuant che si è adalt e la fumate no ti fâs viodi il mont e la strade juste.
◆ Par evitâ di incidi ancjemò plui a fuart, al bisugne individuâ daurman areis di campagne di grandece significative, massime intai fonts des vals, di lassâ libaris di insediaments. Tal stes moment, si scuen sensibilizâ la int, e chest articul al à ancje cheste finalitât, e meti adun formis di gjestion che a permetin, in plui dal mantigniment di une minime complessitât struturâl e funzionâl dai ecosistemis agricui, ancje di ripristinâ elements ambientâi, ativitâts agriculis, silviculis e pastorâls e di tipologjiis culturâls propriis di zonis rurâls tradizionâls, insiemi aes varietâts locâls di plantis coltivadis e di animâi arlevâts. Par fâ chest, al covente che lis problematichis a sedin tratadis di cui che si intint di conservazion e no, come par solit, di personis che a ocupin une “posizion”. L’autôr al dâ la sô disponibilitât a cui che al vûl lâ in cheste direzion.
Da pît, al covente ancje capî che i ambients agricui des monts a son di calcolâ tant che areis clâf par diviersis speciis tipichis, duncje a son di protezi di plante fûr parcè che no si pues pensâ di conservâ la eterogjeneitât ambientâl e la biodiversitât tutelant dome lis areis protetis. ❚