Il Friûl e je une tiere e une regjon fondade su lis lenghis

Al diseve pre Checo Placerean: “visaitsi simpri che chê taliane e je la ultime fevele rivade in Friûl, vignude dal forest. Furlan, todesc e slâf a jerin chenti za di secui cuant che la int e à scomençât a talianotâ. No vês mai di mancjâ di rispiet ae vuestre lenghe mari”. Par chei che a son cussients di cheste realtât, tes ultimis setemanis e je une gnove di chês stuzighinis: pe prime volte lis trê lenghis locâls dal Friûl si metin adun. Vuê par fâ une rêt di promozion e di tutele comun, doman cuissà.
◆ Lu àn clamât il “Pat di Spilimberc”: lis rapresentancis des lenghis minoritariis dal Friûl-Vignesie Julie (furlan, sloven e todesc) si son dadis dongje inte cunvigne “Une tiere, 4 lenghis – passât presint avignî dal plurilinguisim in Friûl-Vignesie Julie” ai 17 di Zenâr, inte Zornade taliane des lenghis locâls a un cuart di secul de promulgazion de leç 482/99 pe tutele des minorancis linguistichis. A sburtâ la operazion e je stade la ACLiF (Assemblee de Comunitât Linguistiche Furlane), che e met dongje 150 Comuns di lenghe furlane, cul Istitût Ladin Furlan Pre Checo Placerean, ma la robe interessante e je che chescj lavôrs a àn viodût pe prime volte ducj ator de stesse taule ancje lis plui grandis rapresentancis associativis slovenis (SKGZ, SSO e ZSKP) e la gnove ACLiT (Assemblee de Comunitât Linguistiche Todescje).
“Al è un moment storic – al à dit il sindic di Caprive Daniele Sergon, president de ACLiF – dulà che o ai mandât fûr la propueste, condividude di chei altris esponents des nestris lenghis locâls, di inviâ une rêt simpri plui strente tra di nô. Un vêr pat fra lis nestris lenghis, che o sin stâts contents di podê inviâ propit a Spilimberc, citât dal mosaic, pal avignî de nestre regjon, che e je un vêr mosaic di lenghis e di comunitâts seneosis di pontâ simpri di plui sul plurilinguisim par tutelâ la lôr autonomie aministrative e politiche. Cheste varietât e je il nestri avignî, no dome il nestri passât: ancje parcè che, numars in man, metint adun ducj chei che a fevelin une lenghe locâl in Friûl-Vignesie Julie, si capìs facil che no je une minorance, ma une largje maiorance de popolazion”.
◆ Sergon al rive aes stessis conclusions di pre Checo. Il grant interès che la cunvigne e à stiçât, cu la sale plene di tancj sindics e aministradôrs dal Friûl-Vignesie Julie, però, al à di rivâ a une conclusion politiche: ven a stâi modificâ il Statût de Regjon Autonome Friûl-Vignesie Julie zontant la tutele dal plurilinguisim come reson di fondazion e mission centrâl.
◆ Intune Europe dulà che il nazionalisim al cres, intune Italie dulà che la autonomie e je reson di division, isal spazi par une sfide come chê di Spilimberc? Nô da “La Patrie dal Friûl” lu sperìn pardabon. Al sarès biel che propit sul ôr dal Tiliment, il Friûl al imparàs a unîsi e no a dividisi: e a puartâ indevant la mission di strenzi i leams te otiche di un potenziament de autonomie no saran mai i partîts talians, ni i parons di industrie che i teritoris ju vuelin dome doprâ par interès. E à di jessi la int a movisi, par fâ capî che cheste Regjon e à la sô fonde su lis lenghis che a àn fat sù la civiltât europeane. E pierdudis chês, di jê nol restarès plui nuie. ❚