Tiliment e identitât furlane…

Aogni tornade legjislative regjonâl e torne fûr la cuistion “Tiliment”. Di une bande il pericul par Tisane, di chê altre la pôre par intervents cence sens tal cors mezan dal grant flum furlan.
◆ Cheste volte si trate di un mûr di roste / dighe che e varès di jessi fate a pene a mont dal puint di Dignan par stratignî un ciert volum di aghe par evitâ pericui di montanis tal cors bas, plui tal teritori de regjon Venit che par chel in Friûl-Vignesie Julie.
◆ Un intervent te part di mieç dal Tiliment nol è un progjet di cumò. Za ai timps di Mussolini, che di bonifiche e regjimazion des aghis al veve fat un dai obietîfs de ditature, si jere pensât di fâ sù une dighe te strente di Pinçan e derivâ un canâl par produsi energjie eletriche e pe irigazion des tieris sutis dal Friûl di Mieç. Al sarès stât il “Canale DUX”.
◆ Finide la seconde vuere mondiâl, e rivade la democrazie e la Republiche, al è stât tornât a tirâ fûr il progjet. Identichis lis tecnichis e i intervents: dighe tra Pinçan e Ruvigne e canâl di irigazion a çampe dal flum. Al cambiave, ben si intint, dome il non de roie: “Canale LIBERTÀ”. Si sa po!
◆ E chest progjet al deventà ancjemò plui di atualitât subit dopo des diluvions dal 1965 e 1966 che a mandarin sot aghe Tisane e une buine part de Basse, cun ancje cualchi muart. In chest câs l’intervent al zontave l’obietîf di metude in regjim des aghis.
◆ Ma nancje in chê volte, no cate l’impegn dal Consorzi di Bonifiche de Basse Furlane riorganizât, in timps di DC e Coldiretti, sot la presidence di Enrico Tosoratti, si rivà a meti sù l’intervent. E nancje dopo, tai agns Setante e Otante, cuant che la Basse e Tisane a jerin al podè cul conducator di Palaçûl, e cui grancj lavôrs publics, il progjet de dighe sul Tiliment al ve aplicazion, ancje pe grande ativitât dal Comitât de int dal Cjanâl dal Arzin che si sarès cjatade inagade une buine part dal teritori.
◆ L’ultin grant tentatîf lu vin tai prins agns di chest tierç mileni, cu lis cassis di espansion dal assessôr Moretton. E ancje chel progjet, pe grande mobilitazion de int di ca e di là da la Aghe, al fo cassât ancje se al veve vût plui di cualchi autorizazion de bande des autoritâts di bacin.
Vuê i tocje a Scoccimarro cul mûr di roste, intun moment dulà che si cîr in dute Europe di rinaturalizâ il cors dai flums, vignint a studiâ propit il Tiliment che pe sô ande libare e cui canâi anastomizâts al rapresente un model di copiâ. Propit cumò, invezit di protezi e se mai rindi plui naturâl il cors de aghe, si vûl meti cubui e cubui di ciment e peton intun dai tocs plui biei e simbolics dal Tiliment.
◆ I Comuns di Spilimberc e Dignan si son za declarâts contraris. Si stan cjapant sù firmis cuintri. Lis Comunitâts di une rive e di chê altre a domandin di zontâ il flum tal patrimoni UNESCO e a son pardabon sul pît di vuere.
Tocjâ il Tiliment vuê no je dome une cuistion di tecnologjie idrauliche e di decision politiche ma al va dret tal cûr de int, e devente cuistion identitarie par ducj i furlans e che no stedin a crodi di meti furlans di Tisane cuintri furlans di Spilimberc par fâ gjoldi triestins, cimentificadôrs e CANAI.
Nissun al à di permetisi di cjapâ decisions in barbe aes comunitâts di chenti. Mancul di mancul sul Tiliment. ❚