Une schirie preziose di ogjets e furniments metûts dongje cun passion di Odi Gonano
Epodarès ricuardânus la prime part de trame di “Nuovo Cinema Paradiso” (opare mestre de cinematografie di Giuseppe Tornatore), invezit e je la storie di Odi Gonano, abitant dal cjanâl Pedarç, e dal so amôr pal cine e pe fotografie, che al fat nassi une realtât inmagante logade intal comun di Prât, in Cjargne.
◆ Al è il “Piçul museu storic pes machinis de fotografie e de cinematografie”, là che si ten cont e si espon une racuelte preziose di ogjets e furniments di gjenar vari metûts adun di Odi vie pai agns. O vin intervistât il fi di Odi, Ronny Gonano, che adun cun so pari al gjestìs il museu e che nus à contât la sô storie.
_
“Cemût e cuant ise nassude la passion di Odi Gonano pal cine e pe fotografie?”
“Gno pari, nassût intal Comun di Prât intal 1946, za di frut al à fat cressi la sô curiositât vivarose, che si è trasformade dopo in passion autentiche, pal mont de cinematografie. Intai agns de sô infanzie a jerin tancj i paîs che a vevin un piçul cine locâl, che in chê volte al rapresentave in dut e par dut une ocasion di agregazion pe int dal lûc. I mieçs par movisi di fat a jerin limitâts, lis distrazions e lis ocasions par straviâsi a jerin dal sigûr mancul di chês di vuê e duncje, in chest contest, il cine locâl al rapresentave une oportunitât straordenarie par cjatâsi ducj intun, imparâ, divertîsi, sintîsi in cualchi maniere leâts, in graciis dai cines, a lûcs tant lontans e a realtâts diviersis. Ancje il paîs di Pesariis al veve il so piçul cine, che al à dismot un atrat fuart dentri di gno pari. Ancjemò frut, une dì al à decidût di jentrâ inte sale di proiezion par capî miôr il so funzionament. Il proiezionist lu à viodût e al à decidût di insegnâi tantis robis peadis a chel mont, fasintlu svicinâ ae fotografie. Cressint, al à cjapât il so puest tant che proiezionist dal paîs, e al à lât indevant in cheste funzion fin al 1970. Po dopo, par motîfs di lavôr, al à abandonât chel mont inmagant e si à trasferît fûr regjon. Intai agns Otante al è tornât al sô tant amât Cjanâl Pedarç e al so vecjo cine, che però cun maluserie al à cjatât sierât e in stât di abandon.”
_
Cuale ise la storie dal “piçul museu storic pes machinis de fotografie e de cinematografie”?
“Dut al è scomençât cuntune racuelte che si è simpri plui slargjade cul timp, di ogjets leâts al cine e ae fotografie, che gno pari al à colezionât intal zîr di cualchi deceni. Al à scomençât intai agns Setante cul recupar di cualchi machine fotografiche, e, po dopo, di cualchi proietôr. Buine part di chescj ogjets le à tirade dongje tai agns Novante, i agns là che lis piçulis salis cinematografichis locâls, aromai di timp in disusance, a vignivin sdrumadis a pro dai grancj cines multisale, che aromai a paronavin dapardut. In chestis ocasions, gno pari al à domandât duncje di cuistâ i proietôrs, in mût che almancul alc di chês piçulis realtâts par lui cussì preziosis al vignìs salvât e tignût di cont. Par agns chescj ogjets ju vin tignûts propit in cjase, fin che intal 2003, in acuardi cul sindic di chei agns, si à decidût di preparâ une piçule mostre, che e à vût une rispueste tant positive de bande dai visitadôrs, di trasformâle in permanente di chel moment indevant. Di chel moment la colezion si è insiorade une vore, ancje in graciis di tantis donazions di personis che no vevin plui interès a tignî in cjase cierts ogjets, e che a son stadis contentis di puartânusai a nô. Il museu al ven gjestît a nivel familiâr, e al è viert a ducj daûr apontament.”
__
Ce cjapie dentri vuê la colezion dal museu?
“Cumò la colezion e conte une desene di proietôrs che une volte a jerin tes salis cinematografichis (aromai sieradis di agnorums) di cualchi lûc chi dongje, tant che Comelians e Udin. O vin ancje un pâr di cinepresis, cierts proietôrs agns ’60-’70, un ralentadôr, e cualchi centenâr di machinis fotografichis. Dentri de colezion a fasin biele mostre lis machinis di proiezion di cine recuperadis e restauradis di gno pari, lis dôs cinepresis Arriflex che a vegnin di Cinecittà (Rome), e une machine fotografiche une vore antighe che dut câs e funzione. Di là di cheste ogjetistiche, o vin in esposizion ancje ciertis locandinis di cines (soredut di classics Disney dai agns ’40) e cualchi locandine e proietôr che nus àn dât a imprest il regjist e fotograf cjargnel Dante Spinotti.” ❚
