Fâ e disfâ, la Penelope di Martignà…

Che il Friûl, la fete di teritori plui grande de Regjon F-VJ, al sedi cence leaders politics mi pâr fûr di discussion. No dome par vie de destinazion dai finanziaments regjonâi, che la plui part a van di là dal Timau, ma ancje pe crisi di vision prospetiche.
◆ Dulà ise daûr a lâ la politiche in Friûl? I partîts no contin plui. Anzit, no son propit! E se a vessin di jessi, cui rapresentino, cuant che la partecipazion al vôt e je simpri plui basse?
◆ A restin forsit dome i Comuns, in cualchi mût, ancjemò peâts aes comunitâts e ae gjestion di robis concretis. Ma ancje chei a son in soference, cjapâts dentri te mancjance di finanziaments, che cuant che a son, a son di spindi par cuistions che magari no interessin, e soredut parcè che a son cence personâl. I piçui Comuns, chei di mont, ma ancje chei de plane, no stan plui in pîts, no son plui in stât di dâ rispuestis aes dibisugnis dai paîs. E i tentatîfs di riformâ i ents locâi – sedi cui ASTER di Illy/Iacop, o cu lis UTI di Serracchiani/Panontin o cui EDR di Fedriga/Roberti – a son lâts in sflics. Si pronte la leç e si scomence un troi par dopo, te tornade aministrative regjonâl seguitive, cambiâ normative e tornâ a partî di zero. Cussì ancje cu la eliminazion des Provinciis. Gjavadis tal 2016, tal 2019 si à pensât di tornâ a metilis. E intant casin… “Fâ e disfâ, dut un lavorâ” e dîs la detule furlane, e al è, no par câs, ancje il titul dal libri autobiografic di un politic innomenât, che par plui di cuarante agns al à vût un rûl di prime impuartance te politiche nostrane.
◆ Al baste pensâ che al è stât vice president te zonte Biasutti, jessût cence scopulis de codebuie di tangentopoli, tiessidôr fin te gjestion de Lega Nord ancje se al jere prime socialist e dopo di Forza Italia, promotôr de sielte dal prin governadôr triestin, Antonione, sponsor di Illy cuintri de Guerra, amì di Tondo ma che al poiave la Serracchiani, cuntun grum di relazions tant di fâsi elei parfin in Pulie, colone fondamentâl dal Progjet FVG di Bini te vitorie di Fedriga che, dopo, lu à scjamât. Cumò in pension ma ancjemò influent tes sieltis tatichis tant di rivâ a meti siei oms te zonte di De Toni a Udin.
◆ Insome, une vere Odissee chê de “Bisate dal Lavie”. E se lui al è la Penelope, la tele e je il Friûl, i presidents de Regjon, di Illy a Fedriga, a son i Proci (cul P). Al mancje però il salvadôr. No si viodin personalitâts in stât di dâ un zîr di volte ae gjestion publiche furlane denant dal Polifemo/Triest. Ulìs, di fat, si jere dât il non di “Nissun”. ❚