“Il 2020 al jere pene tacât e, dentri dai lavôrs che si fasin intune ostarie ae fin dal an, al jere capitât ancje chel di gjavâ vie la liste dai clients viere, plene di polvar e cun dentri une grampade mâl imbastide di iscrits. O vevin pensât, cussì, di meti in vore une gnove, cun plui snait e atrat, in maniere che i gnûfs a podedin ricevi i inzornaments dai prodots butâts fûr vie pe setemane drets te lôr cassele di pueste”.
◆ Une conte par mês compagnade di un saç storic antropologjic sul folclôr in Friûl.
Il libri al è nassût intal periodi de plui ferbinte pache dal COVID. E intes contis al è dut un businâ dai protagoniscj cuintri lis misuris anti-infet cjapadis des autoritâts: students, pensionâts viei, feminis solis, int di campagne ducj in sintonie intal cjapâse cul coprifuoco stupit, cul virus che al è une invenzion dai gjornâi, cu la DAD, cu la polizie che e da multis a sterp falît, come se lis processions di cassis di muart sui camions a fossin une messe in sene di no si sa cui! Di là di chestis considerazions, la fantasie no i mancje a Rafaêl, come che a san ducj chei che a cognossin i siei libris e la sgrimie che al dopre intal meti adun chê piçule opare mestre che e je Contecurte. Ve alore une galarie di personaçs un plui vivarôs di chel altri: un ex galiot, une frute disabile, un vecjo intun ospizi, un altri che al tire cumò la cidule che al varès vût di tirâle cincuante agns prime, il predi che al torne a meti impins la rogazion, une femine purcitarie cui siei purcits di Sant Antoni, i coscrits che a plantin il lôr Mai cun tant di sgjarnete, la mari che i insegne lis letaris dal alfabet al so frut che nol pues lâ a scuele, la vedue che e met il cjaldîr cu la aghe su la puarte di cjase pal so om muart e v.i. Serene, de bande sô, e met adun une sorte di piçule enciclopedie di usancis, tradizions, rîts leâts aes formis religjosis che intai secui a àn caraterizât chestis tieris. Intes divinitâts atavichis si plate la etimologjie di tantis peraulis che o doprìn ancjemò noaltris. E tantis celebrazions paianis a son stadis rielaboradis dal cristianisim cuntune operazion di sincretisim che e à conservât il lôr leam strent cul cicli naturâl des stagjons. Nadâl, Pasche, lis temporis, e tancj sants dal nestri calendari a vegnin di li. ❚
