ATUALITÂT. Il mâl… de toghe

Int curiose, i furlans. Un popul cun lidrîs profondis, cuntune storie, une lenghe, un mût di viodi il mont, di crodi: intune peraule, cuntune culture uniche e impuartante. Ma cence memorie, cence cussience de propie origjinalitât. Dibatude jenfri une fumate che e scancele i confins di une identitât fuarte, che e lasse pal aiar nome il ricuart di ce che e je stade, e reste la testemoneance di int che e à scrit pagjinis impuartantis de storie de Piçule Patrie, partint des aulis dai Tribunâi.
I furlans tant che il «Guerin meschino». Un paragon curiôs.
Cuant che o jeri frut, o ai discuviert tal granâr di cjase une vecje edizion di chest libri, une vore famôs, une vore let, tant che ducj a savevin cui che al jere il Guerin Meschino. Il non al jere tant familiâr che un setemanâl sportîf, nassût tal 1912, al puarte il so non: «Guerin sportivo».
Di resint mi è vignude gole di tornâ a leilu, ma cjatâlu in librarie e je stade une imprese.
Parcè po?
La sorprese e je stade scuvierzi che nol jere plui publicât. O ai scugnût spietâ avonde par vê une copie.
La storie di chest cavalîr e je paradigmatiche. Come i furlans al jere nobil, ma nol saveve di jessilu. Nol cognosseve, come che i furlans no si visin plui, cualis che a son lis sôs lidrîs. Al sintive tal sanc la nobiltât, ma nol cognosseve i siei gjenitôrs.
Ven a stâi?
Il passât dai furlans al è siôr no dome di personalitâts ma ancje di acjadiments unics. O fevelìn di une identitât complicade, dibatude tra dignitât e rispiet pe tradizion, a mieç jenfri la culture latine, gjermaniche e orientâl. A Cividât o vin vût Paolo Diacono, l’autôr de Storie dai Langobarts. Udin e je stade la capital di un Stât. Il Friûl al è deventât il Ducât de Patrie dal Friûl cun ducj i dirits di un stât. Al jere simpri un feut dal imperi, come che a jerin i reams di Gjermanie, ma in pratiche al jere paron a cjase sô, e cheste paronance e je durade fin al 1420, cun tant di codiçs di leçs, di libertâts, ma soredut di un Parlament, il prin european.
Cuant che e je rivade, Vignesie e à puartât la modernitât, ma e à gjavât la autonomie.
O fevelìn dal Patriarcjât di Aquilee. Scune di une identitât, o ce?
La sô impuartance storiche e je une vore grande. Al è un simbul che al rapresente l’unic tiermin di riferiment pe identitât furlane e che al pues jessi cjapât come element determinant inte storie dal Friûl. Che al pues jessi tantis robis, ma di sigûr no provinciâl. Cheste memorie e je lade pierdude. Cui cognossial il Patriarcjât di Aquilee? La scuele no insegne cheste storie, la nestre storie, come che al diseve Pre Checo Placerean. O savìn dut dal imperi roman, de rivoluzion americane, ma il tassel dal Patriarcjât di Aquilee nus mancje.
E parcè la storie dai avocats furlans lui le ritegnie significative?
Il Patriarcjât al è il simbul ancje de indipendence de classe politiche furlane.
Pensìn al cjant liturgjic, cui coros che si contraponin, ae dialetiche naturâl, e ancje culturâl di cheste int. Pensìn al Parlament.
Cheste e je le tiere dulà che, in dì di vuê, a son madressudis lis personalitâts di avocats che a son stadis espression de societât civîl.
O vin vût vêrs «leaders», naturalmentri ricognossûts de int, che a son stâts la classe dirigjente dal Friûl, in posizions di prin plan ancje tal Paîs, a Rome.
Zontraviers di lôr, des lôr storiis, privadis e professionâls, o cjalìn fûr di un barcon che nus conte la storie di une tiere.
SONIA SICCO