O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô al à publicât doi libris, “Cuintristorie de prime vuere mondiâl” e “Anime in crôs”.
Si trate di un ricognossiment al pinsîr di nivel internazionâl di un om fûr dal ordenari che di simpri al lavore par stiçâ l’incuintri des culturis, ma o sin contents che il Premi Nonino al vedi onorade prin di dut la opare di un grant furlan che in maniere gratuite e disinteressade al pant cun onôr il valôr de identitât, de culture e de lenghe de sô tiere. E lu fâs in maniere libare, propit come nô. Par chest la “Patrie” e sarà simpri la so cjase.
Brâf Agnul! La to vôs e fâs onôr al Friûl
