Un percors lunc e intrigât, ma di sucès
La emanazion resinte dal Decret Ministeriâl che al à aprovât in maniere uficiâl il ricognossiment dal Consorzi di tutele dai vins dal Friûl-Vignesie Julie e la assegnazion a chel de incarghe pes funzions di promozion, valorizazion, tutele, vigjilance, informazion dal consumadôr e cure gjenerâl dai interès dai associâts pe Doc “Friuli” o “Friuli Venezia Giulia” o “Furlanjia” o “Furlanjia Julijska”, nus ufrìs la ocasion par fevelâ di chest tassel impuartant de filiere vitivinicule regjonâl.
Cuatri riis di storie
Di Doc “Friuli” si à scomençât a fevelâ cui conts Attems za intai agns ’70 dal secul passât. A son stadis po dopo diviersis provis di costituzion, dutis falidis. E je dal 2014 la racuelte necessarie di sotscrizions tra i produtôrs par fâ partî la gnove faliscje. Tal Mai dal 2015, fuart di 1.703 firmis, si à inviât l’iter burocratic che al à compuartât la discussion des regulis previodudis dal Ministeri des politichis agriculis; la clamade di dôs Comissions nazionâls tecnichis normativis che a son stadis fatis tal Otubar dal 2015 e tal Fevrâr dal 2016; la audizion publiche di Març e la delibare dal Comitât nazionâl Vins che e à dât vie libare pe publicazion te Gazete Uficiâl dal Dissiplinâr Doc “Friuli” o Doc “Friuli Venezia Giulia”, che e je stade fate ai 20 di Avrîl dal 2016. Il Dissiplinâr si componeve di 10 articui e, par altri, al indicave intal Ceviq srl (Certificazion vins e prodots talians di cualitât) di Udin, l’organisim di control autorizât, che al va indenant ancjemò vuê intal so operât. Finît chest percors, tacant de vendeme di chel an, i roncârs regjonâi a àn podût aplicâ la gnove Denominazion su lis etichetis des butiliis.
Numars di sucès
Si à di dî che no si cjatìn devant di une Doc di sostituzion, ma di une in zonte, “ombrene” al dîs cualchidun, stant che si loghe in maniere trasversâl a pet des Doc “storichis” de regjon, creant oportunitâts comerciâls gnovis pai singui roncârs che a puedin decidi se “invistî” su la lôr Doc teritoriâl (cualchi volte masse piçule o pôc cognossude) o suntune Doc che e svante un non tant plui evocatîf e declinabil sedi par talian che par sloven.
◆ La Denominazion, cjapant dentri il teritori di 160 Comuns di dutis lis cuatri ex provinciis, e je la plui grande de regjon, ma par che e fos operative a plen, al coventave un Consorzi di Tutele che al à vût di spietâ ben trê agns (il 2019) par jessi fondât, e restant intune fase di “riflession” fin ae fin dal 2022 (altris trê agns!) par otignî il ricognossiment ministeriâl e, duncje, la operativitât complete. Il Consorzi al à cumò da cjâf l’enolic Stefano Trinco che al à cjapat il puest di Giuseppe Crovato.
◆ Un troi cussì malvualîf puedial volê dî che si è creade une gnove sorestruture inutile inte architeture za complicade dal mont dal vin in regjon? No. O sin daûr a scrivi di une Doc di sucès, viodût che, daûr dai dâts furnîts dal Ceviq, intal 2021 i etars a vît cjapâts dentri a son stâts 2.967 (a jerin 2.497 intal 2018), par 163.431 etolitris di vin produsûts che, intal 2022, a son cressûts dal 17%, rivant a 191.190 etolitris complessîfs. I numars plui significatîfs a tocjin il Pinot grîs tra i blancs, e il Merlot tra i ros. ❚
