Il 2020 al jere a pene tacât cuant che te Ostarie e jere saltade fûr la idee di regalâ ai clients plui afezionâts un biel butilion di vin speciâl: un prodot stagjonâl, peât e ambientât tal mês di riferiment, metût adun doprant la fonde dal ambient che si leve disvilupant intai dîs de sô creazion.
◆ La date sielzude pal metilu sul marcjât e je stade ai 16, inovâl de nestre ostarie. Se ancjemò nol è clâr, la Ostarie che o fevelìn e je leterarie, si cjatile sul web e si clame Contecurte (www.contecurte.eu), e ai 16 di ogni mês, a scomençâ dal Zenâr dal 2020, ai gnûfs iscrits de Liste ur sarès rivât chest regâl: La Conte dal Mês.
◆ Il prodot al jere fat di doi ingredients, peâts e misturâts: une conte lungje, scrite dal Ostîr cun fats che a sucedevin in prese direte e argoments che a tiravin dentri il secont ingredient, un articul di sagjistiche de Coghe che al meteve dongje sugjestions e informazions dal folclôr e des tradizions dal Friûl plui antîc. Come intun calendari, dilunc dal an, mês daspò mês, lis storiis si son disvilupadis, regalant ai letôrs un struc di savê furlan e une sorte di diari di chest an bisest e dal sigûr unic, te storie dal om.
◆ Cun di plui, a ogni jessude, la Conte e vignive insiorade di une cuvierte di pueste e dai contribûts dai colaboradôrs de Ostarie: i piçui aiutants de Ostarie a regalavin i lôr dissens, il Famei contis curtis a sorprese, il Berlon la sô interpretazion di atôr, la Massarie un teme sonôr, il Cramâr la sô competence cjargnele di marcjadant, la Sartore e cusive il dut.
◆ Ogni conte e disvele za tal titul il riferiment al teme dal mês e il non sielzût, une uniche peraule par ogni storie, al evoche simpri un element naturâl, vûstu parcè che lis tradizions tocjadis intal articul a lavin indaûr a storiis de mitologjie antighe, vûstu parcè che vie pal an il contat cul ambient si è dimostrât simpri di plui un bon cuintrivelen ae situazion che si jere daûr a vivi.
◆ Tant che intune trame che a prin viodi no somee vê un dissen precîs, ma che e ubidìs aes leçs di un mont che nol è chel dal om, a nassin e si dan di volte te struture narative Fum, Len, Boris, Tiere, Butui, Flôrs, Claps, Pomis, Fros, Piere, Vues e Nêf. Une gjeometrie dai elements, che si disponin ai antipots ma che in veretât a son necessaris par che si inveri l’element seguitîf e par che lis contis, ancje se disleadis la une di chê altre, a podedin cjapâ vite ta chest an malsestât.
◆ Cussì come che ogni element al è unic, di fat, unic al è ancje il protagonist di ogni storie, che nol torne mai a saltâ fûr, sierade la sô aventure, ma che al fâs di spieli aes reazions di chei altris personaçs, intune sorte di piture a fresc corâl, indulà che une comunitât si presente e si mostre intes sôs debilecis e inte sô resistence intal frontâ il mudâsi universâl dal destin uman.
◆ Ma se il conteflabis al podeve permetisi di lassâsi menâ ator de fantasie, ae Coghe i à tocjât di tignî ben ferme la brene dal pinsîr, par presentâ une taule parecjade cu lis tradizions dal Friûl: dal pignarûl, aes cidulis, becolant alc sul Mai o sul mac di Sant Zuan, par dopo cerçâ alc des sagris e roseâ un tocut di purcit, par finî cuntun brindis aes tradizions dal Nadâl, stant ben in vuaite al prin sglinghinâ di sampogns!
◆ Dome cumò si rindìn cont di trope robe che o vevin parecjât ta chescj mês (324 pagjinis) e, stant che o sin di buine bocje ma ancje di bon cûr, o vin il plasê di condividile cun ducj voaltris.
Une ultime indicazion: ancje se a van daûr dal lunari, conte e articul a puedin jessi lets cence un ordin precîs. Dait une cjalade al menù e lassaitsi pûr ispirâ dai nons e de vuestre curiositât!
Bon pitic e buine leture,
I autôrs
“Lis contis dal mês” di Raffaele Serafini e Serena Fogolini a son stadis presentadis ai 21 di Zenâr dal 2023 alì dal agriturisim Pituel di Talmassons. Cui che al fos interessât al pues ordenâ la sô copie su Amazon o ben mandâ une mail ae clape di Contecurte (contecurte@gmail.com). ❚
