Al Civiform un Visual Lab pe art digjitâl

Al Civiform al è stât screât “Cividale Visual Lab”, un gnûf spazi multilaboratoriâl sostignût de Fondazione Friuli. In graciis dal cofinanziament de Fondazione, di fat al Civiform al è stât creât un spazi furnît di aparâts professionâi, destinât a formâ professioniscj de grafiche, de fotografie e de videografie, indotât di locâi di pose modulârs e di une aule didatiche cun imprescj inovatîfs. L’inmodernament al à interessât la ristruturazion edîl e implantistiche in locâi vieris dulà che si à realizât une struture integrade che e permet di davuelzi i cors su la fonde di une metodologjie didatiche inovative: a son saltâts fûr doi grancj laboratoris dulà che si puedin fâ sets fotografics e seguî progjetazion e post produzion. I spazis di pose a son struturâts in 5 sets diviers: ritrat, prin plan, ritrat a figure interie, green screen e par lezions frontâls e dimostrativis. Il Visual Lab al è stât completât cuntun gnûf sisteme di iluminazion a led cun diviers ponts di impiament funzionâi aes diviersis esigjencis e la presince di fondâi, cjadreis mobilis e proietôrs multimediâi cun tendis par fermâ la lûs dal soreli, che a permetin un control perfet de lûs. Il laboratori al è stât prontât cun 24 postazions Imac 24”M1 di gnove gjenerazion, la miôr strumentazion par gjestî imagjins e par progjetâ prodots editoriâi multimediâi cun softwares professionâi come Adobe Creative Suit e DaVinci Resolve. Sul front didatic, cun chescj mieçs al è duncje pussibil sperimentâ une vore di situazions par realizâ fotografiis e videos digjitâi, in plui di garantî la pussibilitât di fâ lavorâ plui sotgrups di arlêfs tal stes timp. «Il supuart de Fondazione, atente di simpri al svilup di progjets a sostegn de educazion e de formazion di zovins e adults, al à metût a disposizion dai utents spazis adats e lis miôr tecnologjiis, garantint une formazion di avanvuardie, simpri plui atente aes richiestis des aziendis», al à dit il president di Civiform Gianpaolo Zamparo. «Il Civiform – al à dit il president de Fondazione Giuseppe Morandini – al invie un altri progjet vincent, che al pues contâ su la modalitât didatiche dal learning by doing, in stât di rindi la scuele orientade al mont dal lavôr e di creâ professionalitât». ❚