TERITORI. Pordenon e je (ancje) furlane!

Su la cjarte, la Pordenon “politiche” no je plui furlane, a pene che il Consei comunâl al à deliberât di jessi gjavâts fûr de aree definide furlanofone daûr de gnove leç regjonâl 32 sul furlan. Ma la citât, la sô int, li sôs stradis, a contin une altre storie: Pordenon e je (ancje) furlane. Di fat, la delibare dal Consei comunâl e je sunade un pôc masse “manicheiste”: o blanc o neri, ma la realtât, si lu sa, e je di ducj i colôrs.
PERSUT CRÛT TAL NUNCIEL_ Al baste cjaminâ tal centri naonian par capî che a chei di Pordenon ur plâs il “made in Friuli”. “A setemane – e dîs Annamaria De Pellegrin, de Prosciutteria Fratelli Martin in vie della Motta –, a van vie dîs persuts. La int di Pordenon e ame gustâ par furlan, no dome persut ma ancje mignestre di vuardi e fasûi, polente cul frico e salade”. Vierte cinc agns fa, la Prosciutteria e je un dai locâi plui frecuentâts de citât. “O vin une vore di clients di Pordenon ma ancje forescj – e zonte Annamaria –, o sin contents”. Ma cumò, cu la delibare comunâl, podarano ancjemò “impuartâ” persuts di Sant Denêl? Chei di Parme a son bielzà pronts.
FURLAN INSIDE_ In vie Dante, invezit, Il Bagaglio al vent cetantis maiutis par furlan. “O soi di Spilimberc – e spieghe la parone Mariagrazia Zannier –, cussì o vin scomençât a vendi lis primis maiutis chi a Pordenon. A son subit plasudis, di chês famosis cun scrit “Superfurlan” o “Furlan inside” fin a chês ultimis “Furlans do it better”. Spiritosis, lis maiutis lis comprin in tancj. “Dal emigrant che al vûl fâ un regâl ai nevôts che a vivin tal forest – e dîs Mariagrazia –, a chei dal Sud Italie che a vivin di tancj agns a Pordenon, fin ai americans de base di Davian. A son pensadis pai zovins, ma a plasin tant ancje ai grancj”. Te cuestion “furlan sì, furlan no”, a Il Bagaglio a àn lis ideis claris. “Pordenon al è in Friûl – e siere la parone –, cussì e dîs la gjeografie, cussì al è”.
UN TOC DI FRIÛL_Savêso ce che al è il “tocj in braide”? Al è il plat furlan plui amât de int di Pordenon. “Al è stât il plui votât tant che “plat tipic” intun concors dal Messaggero Veneto – al dîs Daniele Lecinni, de ostarie Al Teston, inte androne delle Mura –. Al è preparât cun polente, creme di formadi Montâs, foncs, scuete e farine brustulide”. Lis ricetis furlanis a son lis plui domandadis ancje di istât. “Frico e polente – al zonte Daniele –, par esempli. O pues dî che a Pordenon la culture dal plat furlan e je fuarte, par no dî dai forescj che a vuelin cussì cerçâ il savôr dal Friûl”. Tai mûrs de ostarie, lis firmis di celebritâts (di Liliana De Curtis, fie di Totò, al nestri Toni Capuozzo) a confermin cheste passion.
VENETA PATRIA?_ Nissun al vûl dî che Pordenon e sedi dome furlane: i leams cul Venit, par esempli, a son une vore fuarts. Ma ancje cu la Austrie, par esempli: Pordenon al jere un feut todesc te Ete di Mieç, e lis cjasis dal centri storic a mostrin cheste ereditât. Ma tes tieris di confin tra une culture e chê altre, come tal câs di Pordenon, e je simpri la voie di radicalizâ lis cuestionis. In chest, il Consei comunâl naonian di cumò nol è stât il prin. Sot la loze dal Municipi, une lapide e dîs: “1866 Veneta terra unita all’Italica patria – 1966 Centenario di glorie puri eroi Pordenone onora, 19 VII 1966 Il Comune – Associazioni d’Arma”. Veneta terra? Mah, al è dome un pont di viste…
Davide Francescutti