Nelvia Di Monte, “Cun pàs lizêr”, Sequals, 2005

“Si è sfantât dut il grîs tal ajar / clip, scuasi di viarte, rais dolz / nus cjarinin di schene, a sburtin / in devant la nestre ombrene / a scuindisi tes crepaduris / di antighis pieris, a distrigâsi / des radîs di un vencjâr bandonât / in gnots di plene”.
◆ La component feminine de poesie furlane e je une biele realtât: Cjantarute, Vallerugo, Pauluce, Buiese, Taverna. E Di Monte. Cheste racuelte e je la tierce prove, daspò di Cjanz da la Meriche (1996) e Ombrenis (2002). La struture de opare si fonde su une poesie introdutive (Un pôc plui in là), di dôs sezions di siet (Siums e Mûrs) e di une finâl (Cun pàs lizêr) che e dà il titul gjenerâl e che e je dedicade a Pierluigi Cappello. Il volumut al è insiorât di une penge introduzion di Anna De Simone, di notis esplictivis de autore stesse e di un pâr di dissens di Domenico Ferrari.
Nassude a Pampalune, Nelvia e je lade vie dal Friûl di frute, ma no à mai pierdût dal dut il leam cu la sô tiere di origjin. La lenghe, fevelade par pôcs agns, metude in bande e parfin dieneade, e je restade in sot de anime cui ricuarts de infanzie. I àn volûts agns par recuperâle; e chest in grazis de figure dal pari, che, intune poesie, jê e imagjine di tornâ a incuintrâ cumò che e à scuasi la sô etât e si domande ce maniere che a fasaran par ri-cognossisi. E alore lis meditazions che i ispire la passegjade di lunc dal flum Adda lis scrîf par furlan, parcè che, fin che a son peraulis e memoriis, al reste simpri alc che no si pues cancelâ par vie che al è ‘impastât a la stesse materie dal mont’. La poesie di contemplazion de prime part e devente impegnade inte seconde cul teme dai mûrs che a son simbul di division: i mûrs sdrumâts des tôrs zimulis a Manhattan a riclamin i bombardaments de vuere intal ricuart de mari; il teremot che, a la fin dal 2003, al pare a tocs la citât di Bam in Iran nol pues no fâ pensâ al teremot dal Friûl dal ‘76; il mûr che il stât di Israel al progjete di tirâ su cuintri i palestinês al dimostre che la creature om no à ancjemò imparât a vivi in pâs. Salacor dome la poesie nus permet di gjavâ fûr cualchi grignel di aur dal nestri vivi, come, par esempli, nacuarzisi de siarpe che un frut al à dismenteât su picjadôr di une scuele: ducj a podevin viodile. Ma la poete le à cjalade. ❚