La Slovenie e cale lis misuris par prevignî la difusion de pandemie

Cun lunis ai 21 di Fevrâr, in Slovenie a son lâts in vore cetancj smolaments des misuris par prevignî la difusion dal Covid-19
◆ Daûr des gnovis regulis, si à di jessi vuarîts de malatie, vacinâts o vê fat un tampon, ven a stai vê la certificazion verde, dome par jentrâ tai ospedâi, tes cjasis che a dan assistence ai anzians e tes presons. Tes scuelis no si fasin plui i autotest; a son stadis revocadis ancje dutis lis limitazions tai ambits de industrie, tes buteghis, tai albiercs, tai ambients in gjenerâl, come pûr tai servizis publics, tant che bancjis, pueste e vie indenant. Par capîsi, ancje par lâ in chescj puescj no coventarà plui la certificazion verde. Simpri daûr des gnovis regulis, i oraris di sieradure a son tornâts chei di prime de emergjence sanitarie. Ambients noturnis, casinôs e discotechis a son di gnûf vierts. No son nancje plui limits par ce che al tocje il numar di personis che a puedin jentrâ tai ambients.
◆ Ce che al vâl inmò al è l’oblic di meti lis mascarutis tai lûcs publics sierâts, tes scuelis e in chês situazions li che no si rive a garantî avonde distance, par esempli tal câs di events culturâi. In chestis situazions, a son limitazions sul numar dai partecipants.
◆ I test antigjenics rapits a saran a gratis dome par cui che al risulte positîf dopo vê fat un tampon di bessôl, pes personis che a à sintoms che a son chei dal Covid e par cui che al vûl finî prime un eventuâl periodi di isolament.
◆ Ma si scuen dut câs vê prudence. Il stes ministri de Salût de Republiche di Slovenie, Janez Poklukar, al met in vuaite: «Se o seis malâts, stait a cjase». ❚