CURTIS E CHE SI TOCJIN. La strade juste… di fâ!

O vin savût che tal mês di Dicembar, il Guvier di Rome al finanziarà par 270 milions di euros i lavôrs pe gnove plateforme logjistiche dal puart di Triest. Prime des elezions politichis dal 2008, il Guvier al veve dât altris 50 milions di euros par rifinî la grande viabilitât di Triest, e in chestis setemanis i triestins a àn otignût di Tondo l’impegn dal prin milion di euros par fâ sù un acuari o parc marin, che al vignarès a costâ in dut 50 milions.
Nô furlans no vin contrarietâts al rinfuarciment des infrastruturis di Triest, in particolâr dal so puart che al varès di rilançâ in plen chê citât par cont de interie aree dal centri e dal est di Europe, cul disvilup dai siei colegaments cul mâr Mediterani, cul Orient vicin e lontan, cu la Asie. Chel al è il grant avignî par Triest, par tornâ a cressi e a disvilupâsi. E no chel di aviersâ ogni proviodiment pal Friûl e vivi di assistenzialisim! Nus somee dome mancul in scuare il batibui che a àn fat a Triest par convinci Tondo a dâur i bêçs pal acuari sul mâr…
Dite chest, o passìn al Friûl  par domandâur ai politics di chenti ce che a stan fasint pes grandis stradis de nestre tiere. Lu domandìn parcè che ju viodìn ducj impegnâts a fevelâ des grandis infrastruturis internazionâls che a varessin di traviersâ e di savoltâ il Friûl ca di vincj o di trente agns (se e va ben!). Cemût fasêso a dismenteâsi dal dut di intervignî, come Regjon e come Stât centrâl, par modernizâ lis stradis ex statâls di Gurize a Udin e di Udin a Pordenon? Su chestis stradis strategjichis pai trafics economics e pe int dal Friûl intîr, vuê si cor cun dificoltâts pesantis, intassadis come che a son di streturis e di paîs di traviersâ . Par fâ front a chest stât di cjossis, lis trê Provinciis furlanis di Gurize, Pordenon e Udin a àn burît fûr un progjet gjenerâl di modernament, dal cost stimât di 300 milions di euros. Chest progjet al è stât fat bon ancjemò trê agns indaûr sei de Regjon, sei de ANAS di Rome, e duncje al sarès subit cantierabil. Fat impuartant ancje par furnî lavôr a impresis e operaris in chescj moments di crisi di lavôr. Ma, purtrop, fin cumò par costruî  su chestis stradis impuartantis dome tarondis di scoriment, e à tirât fûr a pene 11 milions di euros…
Par noaltris, cheste rispueste cussì tegnose no vâl a modernizâ la principâl infrastruture stradâl dal Friûl, che dulintor di chê, al bat il cûr economic de nestre tiere. E je une rispueste dal dut inacetabile!
Curtis e che si tocjin, inalore. Par chestis dôs stradis di valôr strategjic pai trafics e pe economie dal Friûl, la Regjon, i parlamentârs, la Comunitât des Provinciis furlanis, i Partîts politics di ducj i colôrs, intindino o no batisi par tirâ fûr – prime di dut a Rome – chescj 300 milions preventivâts?  Il Friûl aial simpri di tasê,  gloti e spietâ?
ARNALT BARACÊT