SPECIÂL – La stagjon blancje

Nêf, ce passion. D’Invier e viest di blanc lis monts dal Friûl-Vignesie Julie, regalant ai amants dai sports invernâi une schirie di oportunitâts par cognossi e divertîsi tai cinc pôi de regjon. Dal cinc di Dicembar, lis stazions di Tarvis, Plan dal Cjaval, Nevee, For Disore e Ravasclêt a deventaran lis capitâls dal divertiment tal  viert. Cun tantis gnovis pal turist che al podarà svagâsi in plene sigurece, stant che chês de Regjon a son tra lis pistis plui siguris dal Paîs.
PRESITS COMPAGNS_ Tant par scomençâ, i presits: pal tierç an consecutîf chei pal abonament dal ski-pass stagjonâl no son cambiâts. Une scomesse de Regjon par vinci la muardude de crisi, cjalant viers une sclaride che e puarti une vintade di otimisim te int, consolidant ancje la presince di turiscj in regjon, a front de concorince di Austrie e Slovenie pardabon simpri plui agressive.
A Tarvis, Çoncolan e Plan di Cjaval, il ski-pass par une zornade al costarà 29 euros, a For Disore 26 euros. Nome a Nevee il presit al è stât riviodût di 2 euros in plui – di 26 a 28 – a front de novitât de stagjon: la gnove piste e la gnove funivie svelte che, a scomençâ dal 23 di Dicembar, a colegaran la stazion di Nevee cun chê slovene di Boveç. Plui di 30 chilometris di pistis, jenfri la Italie e la Slovenie, dulà che si podarà cori cuntun unic ski-pass. Une ocasion par tirâ fûr dal armâr il progjet «Cence confins».
GNOVIS AREIS_ Ma i apassionât dal ‘Circul blanc’ a cjataran ancje une gnove aree par fâ snowboard e freestyle a Plan dal Cjaval, une rivisitazion funzionâl de Aree Cimacuta a Fors Disore, une gnove piste di scoriment a Ravasclêt – Mont di Çoncolan e un adeguament dal percors de piste B a Tarvis.
La stagjon invernâl 2009-2010 e sarà ancje spetacul. A son tancj i events sportîfs che si tignaran su pes monts furlanis e dal pordenonês. Tant par fâ cualchi non, lis finâls de Cope europeane di schi alpin, masculin e feminin, che a saran dai 8 ai 13 di Març, jenfri Tarvis e Kranjiska Gora.
Di chest an al sarà  ancje plui facil e comut rivâ su pes pistis, in gracie di un gnûf servizi di bus navete che al colegarà albiercs e pistis dal Tarvisian.
E par movisi cun plui libertât, ancje di spese, la Regjon, adun cun la Bancje Popolâr di Cividât, e à studiade une cjarte di credit speciâl pal schiadôr.
PISTIS SIMPRI PLUI SIGURIS_ Un cjapitul a part e merte la cuistion sigurece, un svant pe Regjon Friûl-Vignesie Julie che e à simpri cjalât cuntun voli di atenzion e investît su chest teme. Ducj i agns incidents a maglin, ator pes monts talianis, la armonie di une zornade passade a fâ sport e a divertîsi sore la nêf. Numars ae man, la percentuâl di incidents in regjon e je dal 0,17% des presincis su lis pistis.
Sot dal coordenament di Promotur e cun la partecipazion di diviers operadôrs de sigurece, chest an a saran trentevot lis unitâts a timp plen ator pai cinc pôi.
IL FUTÛR_ E i progjets pal doman? Al fevele cun prudence l’assessôr regjonâl al Turisim, Luca Ciriani, in ocasion de presentazion de stagjon invernâl. Seont lis previsions – al à dite –, il 2010 al sarà l’an de riprese e la Regjon e spere intune conferme des aspetativis. «Pe regjon, il turisim al è une risorse strategjiche: chê passade e je stade une stagjon une vore positive e o cjalìn il doman cun otimisim». Cjalant cuntun voli il cîl che si spere siôr di nêf.
Pal moment al è  sigûr che la Regjon no metarà fûr altris palanchis par gnovis pistis e implants, o par tirâ sù un sest pôl turistic a Sauris, come che a voressin plui vôs jessudis fûr. «O vin bisugne di concentrâ lis risorsis – al à spiegât Ciriani – par pontâ a miorâ la cualitât e la cuantitât de ufierte alberghiere e dai servizis pal turist prime e dopo la schiade». Di fat, un dai limits plui grancj de ufierte regjonâl e je le ricezion turistiche, che e sufrìs il confront cui cusins austriacs e slovens.
Dut câs, si spiete par Dicembar une altre notizie de regjon su Pramuel, cuant che la comission nomenade dal assessôr regjonâl aes Infrastruturis, Riccardo Riccardi, al pandarà la decision su la ufierte dal Grup Doppelmayr, aziende leader te costruzion dai implants di risalide.
Sonia Sicco