SPECIÂL – Storie di Nadâl

«A contavin che a là vie in Austrie al è un paîs che si clame Grossburg, jo almancul ai tignût a ments a cussì, no sai se al è o se a nol è… chel al ere l’unic paîs intal mont dulà che il glon dal Gloria di messe a miezegnot, invezit di sunâ a miezegnot, come dapardut, al sunave dîs minûts plui tart… e alore a spiegavin il parcè….»
E jere une vecje che e veve cuasi cent agns e cheste vecje e usave ogni an fâ une biele maie par regalâ a Jesù Bambin par cualchi frut che al veve frêt. E jere la vee di Nadâl, il vincjecuatri di Dicembar, e tor las nûf, dîs e jentre la muart. La vecje e gucjave e e steve finint la maie, nome che e jere vignude pere, e steve un pieçut a fâle. Alore e alce i vôi e i domande ae muart:
– Ise ore?
– Sì – i dîs la muart – e je ore. Met vie in bande il lavôr e anìn cun me che cumò e je rivade la ore.
– Joi – disè – ti prei, lassimi ancjemò un moment che jo o scuen finî cheste maie, se no Jesù Bambin al à frêt, se no rivi adore di puartâje.
– Cetant timp ti vuelial? –  i dîs la muart.
– Eh, mi vûl almancul dôs oris.
– Ti bastino dôs oris?
– Sì, dôs oris mi bastin, o rivi a finîle.
– Ma viôt che chest ritart achì ti puarte vincj agns di pene sul Purgatori, parcè che jo o scuen ritardâ dut il zîr che o fâs.
– Joi… tant!– e dîs la vecje
– Sì tant!
Alore la vecje e sta un tic sore pinsîr:
– Po ben, nol impuarte, baste che o puedi finî la maie! Jo o fâs vulintîr chescj vincj agns di pene tal Purgatori.
Alore la muart si sente in bande e e spiete che la vecje e finissi la maie. Al à finide pôcs minûts prime di miezegnot. E impachete sù la maie….
– E cumò… nin! – i dîs la vecje.
Alore e partìs jê e la muart, e a cjaminavin sul stradon par lâ in glesie. Cuant che a àn fat un toc sul stradon, a viodin un grant sflandôr vignî indevant di lôr. No capivin ce che al jere. Al jere Jesù Bambin che dal Paradîs al lave in glesie par nassi.
Jesù Bambin si ferme e i dîs ae muart:
– Ce fâstu tu achì?
O soi che o compagni cheste vecje achì a fâ vincj agns di pene tal Purgatori parcè che a mi à ritardât di dôs oris il gno lavôr.
E Jesù Bambin i dîs:
– Va tu, che mi rangji jo cun jê.
La muart e continue bessole e Jesù Bambin al cjape la vecje a braç e la compagne in Paradîs. Po dopo al torne indaûr.
Ma tal compagnâle e tal tornâ al à pierdût dîs minûts e alore… il Gloria al sunave in chest paîs dîs minûts dopo di ducj chei altris….
VITE E MUART_  La vite, vuê come une volte, e jere fat di tancj moments, moments par contâ, moments par preâ, moments par ridi e ancje par vaî come cuant che e mancjave une persone. O vês di savê che timp indaûr, intal Cjanâl di Sant Pieri in Cjargne, a puartavin ducj i muarts te glesie mari di Sant Pieri pal fat che intai paîs no jerin ancjemò i cimitieris. Di Invier chest nol jere pussibil pal fat che i trois par rivâ nancje no si ju viodeve. Capitave cussì che, tal periodi des grandis neveadis, ogni famee e tignìs il so muart in cjase sul cjast, spietant la biele stagjon par dâi la sepulture. La muart e faseve part de vite, e dute la comunitât si strenzeve dongje la famee che e viveve il displasê di une pierdite.
TANT CHE MIDISINE_ Tornant ae nêf, bisugne dî che e podeve jessi ancje une midisine. I vecjos a conseavin a chei che a vevin i poleçs («geloni») di cori discolçs inte nêf, e cussì il mâl al sarès passât. Provâ par crodi!
La nêf e à ancje une robe curiose che le rivuarde Si diseve che in Primevere e veve di vignî cuatri voltis, e ogni volte par une categorie di personis diviersis: pai fuarts inamorâts, pai malmaridâts, pai vedrans e pai samençâi (cuant che si samenave al veve di neveâ).
Nô, che ogni an o bramìn la nêf, che o sin contents cuant che dome al faliscje, sperìn di podê dî chest an «e ven jù che Diu le mande!» e se par Sant Blâs (ai trê di Fevrâr) no sarìn ancjemò stâts contentâts, alore o vin simpri un vecjo mût di dî che nus pues judâ, soredut te prime part: «A Sant Blâs se no le cjate le fâs e se le cjate le disfâs!».  (M. Q.)
Manuela Quaglia