A Ptuj e Krško i gabinets publics plui in ordin

Ancje chest an il circul pes malatiis inflamatoris intestinâls al à assegnât un ricognossiment ai puescj che in Slovenie a an i gabinets publics plui in ordin. Vie pal an i socis dal circul a an vuidât su passe 4000 chilometris di stradis e fat une valutazion sul puest in 158 gabinets publics atôr pe Slovenie. Cui ch’al à la lôr malatie al scuen lâ tal gabinet ancje trente voltis par dì; par chest a scuegnin vê simpri svelt e sot man un aces a un gabinet. Di 13 agns a dan un judizi sui gabinets tai Comuns citât, tai Comuns plui piçui e tes stazions di servizi dilunc des autostradis. Daspò une comission e valute pal circul la acessibilitât, la segnalazion dal punt di aces, l’ordin, il numar di servizis, i servizis par personis cun difarente abilitât, la dotazion e i materiâls igjienics.
◆ Sintude la comission, chest an il circul al à assegnât i premis pai gabinets plui in ordin de Slovenie pal 2021.
◆ Il prin premi al è lât a Ptuj te categorie des Comuns Citât e a Krško te categorie dai Comuns plui piçui. Tra lis stazions par fâ benzine il miôr judizi e il prin premi lu à vût la stazion Petrol di Mlaka, lant viers la Italie. Un grant miorament te “graduatorie” lu an fat la citât di Murska Sobota e lis localitâts di Piran, Rogaška Slatina e Laško.
◆ Par cuintri, a van ricognossiments ancje aes localitâts che a an inmò di dâi sot tal mantignî i servizis publics. A chês che a scuegnin lavorâ pardabon cetant il circul al dà un scovet. Tra i Comuns citât lu à vût Nova Gorica, tra i Comuns plui piçui Vrhnika e tra lis stazions di servizi par fâ benzine OMV Lukovica, lant viers Lubiane.
◆ La comission e note che in cetancj puescj no son gabinets pes personis suntune carocele, ma dome par oms e feminis e che di cetantis bandis no si pues cuant che il gabinet al è stât netât.
◆ Cetancj gabinets a son daûr paiament e par chest no si rive a jentrâ ae sclete. Tal 2016 il circul al à burît fûr une app par telefonuts Najbližji WC che e jude lis personis a cjatâ il gabinet public viert logât plui dongje. Cualchidun ch’al rasone masse ae sclete al pues ridi di ce che al miore la vite di cetantis personis. ❚