In Groenlandie i indipendentiscj ecosocialiscj di Inuit Ataqatigiit a vincin lis elezions

Chê dai 6 di Avrîl dal 2021 e sarà ricuardade par sigûr tant une zornade storiche, no dome pe Groenlande, ma ben par ducj chei che ancje inaltrò i tegnin al autoguvier teritoriâl, al disvilup sostignibil e al rispiet pe tiere e pe int. In chê dì, inte grande “isule verde” che si cjate a Nord dal Canadà, ma che e je sot dal Ream di Danimarcje, a son stadis lis elezion “regjonâls”, segnadis de vitorie dai indipendentiscj, ecologjiscj e di çampe di Inuit Ataqatigiit (IA, Comunitât Inuit), che cumò si cjatin ae vuide dal guvier groenlandês cul lôr segretari, Mùte Egede.
◆ Il risultât, za interessant par so cont, si insuaze inte situazion specifiche de Groenlande dai ultins agns, segnade dal fat che par vie de sôs grandis risorsis minerariis – zinc, nichel, ram, titani, cobalt, aur e urani – e dai siei jaciments di idrocarbûrs, la grande isule e je tornade al centri di interès grandonons, compagn che ai timps de Vuere frede, cuant che i Stâts Unîts le vevin sielzude tant che posizion avanzade dulà plaçâ radars e basis cui missii pontâts viers de Union Sovietiche. Cun di fat USA, Russie e Cine a àn tornât a pontâ la lôr atenzion su la isule e tal 2019 Donald Trump al veve fintremai fat indenant al guvier di Copenhagen la propueste di comprâle dute interie.
◆ Cun di plui, a son diviersis lis multinazionâls che a àn lis licencis pe ativitât estrative inte isule. Il “plat” plui siôr al è chel di Kuannersuit. Par chel, za cualchi an indaûr, il guvier locâl di in chê volte, formât dai autonomiscj socialdemocratics dal Siumut e dai Democratics (unioniscj di centridiestre), i veve dade la concession pe estrazion di urani e di metai rârs ae australiane Greenland Minerals, che il so azionist principâl al è la Shenghe Resources di Shanghai e duncje il guvier di Pechin.
◆ Chê decision e veve discjadenât daurman lis protestis de int, soredut de bande dai natîfs Inuit (che a son sù par jù il 90% de popolazion), tacant dai abitants di Narsaq, la piçule citât che si cjate juste a 10 km di distance dal sît minerari. Lis preocupazions a jerin di caratar economic – in cont dal fat che la Groenlande no varès gjoldût pardabon des sôs risorsis – e soredut di caratar ambientâl, cun riferiment al impat su la tiere, su lis aghis e su la salût dai detrîts radioatîfs produsûts de estrazion dal urani e dai polvars che a rivin de lavorazion dai metai rârs.
◆ Cuintri de viertidure de miniere di Kuannersuit a son stadis manifestazions, assembleis, petizions e posizions de bande di diviers partîts politic e de bande di un moviment spontani che si à dât adun cul non di “Uranis Naamik” (Vonde Urani). La mobilitazion e à creât une crevadure dentri dal Siumut, cun diviers socialdemocratics che a àn scomençât a meti in discussion la sielte di inviâ il sfrutament dal sît minerari, e pôcs mês indaûr i siei partners di guvier, i Democratics, a àn fat colâ il guvier.
◆ A son rivadis cussì lis elezions anticipadis, segnadis propit de vitorie di IA, che fin dal principi al jere cuintri dal sfrutament dal sît di Kuannersuit, par vie dal so impat masse pesant sedi pal ambient che pe economie. La sô linie programatiche, in gjenerâl, e je chê di une gjestion ecuilibrade des risorsis minerariis, badant ai interès e ae salût de int e pontant a ridusi la sô dipendence economiche di Copenaghen e a miorâ lis cundizions di vite de popolazion. Cumò al pues metile in vore, adun cui indipendentiscj centriscj di Naleraq e ancje cu la poie dai doi rapresentants dai unioniscj liberâi di Atassut. ❚