Sgarfefurlans – Cirint furlans ator pal mont

Ai 2 di Jugn e je partide su lis frecuencis di Radio Onde Furlane Sgrafefurlans, la gnove trasmission di Loris Vescovo: un progjet/documentari de Comunitât Culinâr dal Friûl, finanziât de Regjon Autonome Friûl – Vignesie Julie e metût adun di Informazion Furlane/Radio Onde Furlane.
Par vot setemanis, ogni lunis aes 10.30, si podaran scoltâ storiis di emigrazion furlane in Australie e Asie contadis dai protagoniscj: di fat l’obietîf dal program al è propit chel di cjapâ sù sul puest un pocjis di testemoneancis di emigrâts/emigrants furlans par po fâlis cognossi ator.
Il progjet al è partît ae fin di Novembar dal 2007, cuant che Loris Vescovo al à cjapât il prin dai 13 avions che lu àn puartât in Australie, Gnove Zelande, Thailande e Cine. Dilunc di chest viaç al à cjatât e intervistât scuasit 50 furlans emigrâts o fîs di emigrâts che a son a stâ e che a lavorin intal forest: furlans di îr e di vuê, di etât une vore difarente dai 20 ai 80 agns, emigrâts ae fin dai agns ’20 o dome cualchi an indaûr. I protagoniscj di Sgrafefurlans a son propit lôr, intervistâts là che a son a stâ, parcè che il fin dal progjet al è chel di dâi vôs, di fâju fevelâ de lôr esperience cence filtris e mediazions. O scoltìn cussì storiis vivis e interessantis, che a sfantin vie cetancj lûcs comuns, e che a contin in maniere passionade ce che a pensin – come osservadôrs “esternis” – dal Friûl e de Italie.
Sgrafefurlans nus mene a scuvierzi paîs lontans, contâts cu la passion e la braure di cui che ju à sielzûts tant che la sô «patrie gnove», ma ancje nus sburtin a pensâ a temis une vore atuâi tant che la identitât, la multiculturalitât e la integrazion.
La trasmission si pues scoltâ sedi su Radio Onde Furlane, sedi in rêt sui sîts di Radio Onde Furlane www.friul.it e de Comunitât Culinâr dal Friûl www.friulicollinare.it. Cun di plui Loris Vescovo al à metût in linie il so diari di viaç, insiorât cun diviersis fotos, si pues leilu tal blog www.travelpod/travel-blog/sgarfefurlans.