I tesaurs musicâi intai museus dal Friûl. Cu la lôr viertidure, al sarà ben tornâ a visitâju

Cu la viertidure dai museus, ancje se a sangloç, intes regjons zalis, e duncje ancje in Friûl, al somee pai amants de culture e de art di tornâ a nassi. Daspò cuatri mês di puartis sieradis, finalmentri si vierzin lis sedis espositivis, lis mostris, lis pinacotechis, i lûcs di conservazion dal nestri savê e des nestris tantis ereditâts. Ben planc e cun dutis lis limitazions, e je vere, ma alc al è miôr di nuie. Di fat, il fin di setemane – cuant che la int e à plui timp par dedicâsi ai plasês des bielecis artistichis e storichis – i museus a tornin a sierâ. Cualchidun al ten viert dome cualchi dì par setemane e cun oraris limitâts, altris a cirin di tignî viert il plui pussibil, ma par evitâ cualsisedi erôr al è miôr cirî ben chestis informazions prime di lâ tal museu che o vin gust di visitâ. O vin centenârs di lûcs espositîfs dapardut il Friûl, de salute privade, al ecomuseu, aes galariis, aes grandis sedis dai museus ricognossûts a nivel nazionâl e internazionâl, come chei nomenâts sul sît dal Ministeri pai bens e lis ativitâts culturâls e il turisim (Mibact), che a ‘nt conte in Regjon 19.
◆ De preistorie e antichitât a la art contemporanie, de culture gjeneraliste a chê locâl, a ‘nd è par ducj i guscj e interès, e par cui che come me al cîr la musiche dapardut, ancje in chei museus che a tratin altris argoments si cjatin facilmentri e dispès, a cjalâ ben, riferiments ae art dai suns.
Si pues sperimentâlu ancje lant a visitâ lis glesiis. Tantis pituris, tancj frescs, tancj altârs, tra sogjets, personaçs e senis variis, a tegnin la musiche in alte considerazion, tant che teme principâl o tant che element une vore rapresentatîf. Struments musicâi, senis dal fâ musiche insiemi, agnui che a cjantin, a sunin, dispès presints intes Anunziazions, intes Incoronazions, intes palis dedicadis ai Sants, come a Sante Cecilie protetore de musiche e dai musiciscj. Par no fevelâ dai orghins e di altris struments musicâi liturgjics che a glorifichin i nestris lûcs sacris.
◆ Stesse robe intai museus: tra religjon e laicitât, la musiche si le cjate dapardut.
◆ Par dâ cualchi drete a cui che al varès plasê di vivi cheste esperience, o consei la visite di un pôcs di museus furlan indulà che il pentagram al è plui o mancul presint.
◆ Prin dai prins al è il dopli museu La Mozartina di Paulâr, dividût in dôs sedis: in vie Jacopo Linussio e in borc di Sant Antoni. E je la sede in regjon che e conserve il numar plui alt di struments musicâi di tast e no dome, in ambientazions stîl Siet e Votcent, grande ereditât dal mestri compositôr  Giovanni Canciani (1936-2018). Un orghin positîf dai prins dal Sîscent, altris struments di epoche baroche, classiche, romantiche, fin al pianoforte a code moderni, in plui che clavicembai, spinetis, arpis, violins, struments a flât di epoche napoleoniche e cetantis altris bielecis unichis leadis ae musiche: ritrats di musiciscj, spartîts, libris a teme, testemoneancis musicâls di ogni sorte. Simpri in Cjargne, tal Museu Cjargnel des Arts Popolârs Michele Gortani (indulà che propit in chest mês e je in cors une esposizion temporanie dedicade al teme “musiche in fotografie”, organizade dal Circul Fotografic Cjargnel) si pues amirâ il clavicembal dal Sietcent, e la sô copie, che al jere apartignût ae famee Linussio, in plui che une sezion dedicade dute aes armonichis e ai struments des filarmonichis.
◆ A Udin, tal Museu Etnografic dal Friûl, e fâs mostre bielonone di se la spinete dal 1563, un dai struments plui antîcs che o vin in regjon, di Domenico da Pesaro, che cun dute probabilitât si cjatave tal cjistiel di Dartigne. Un strument di cualitât e valôr cetant grant, di fâ invidie ai museus musicâi di dut il mont, cence esagjerazions (o conti la sô storie tal articul chi sot). Simpri li, o vin un salteri dal secul XVII, la bunkula de tradizion roseane, struments a cuarde de colezion Mauroner e ancje une biele pianole mecaniche di fin Votcent, in plui che testemoneancis sui bai e sui cjants furlans.
◆ Se o lin a Cividât, tal Museu Archeologjic Nazionâl, ancje li e je la musiche, tant che il violoncel apartignût al predi e compositôr Jacopo Tomadini, par dînt un. E inmò, se o lin a Pordenon, a Palaç de Nordis, sede de Galarie di art Moderne, si cjatin dôs palis bielis e cetant preziosis, une di Antonio de’ Sacchis e une di Zuanfrancesc di Tumieç, che a mostrin, dongje di sants e di figuris in preiere, agnuluts cun struments musicâi di stamp rinassimentâl, o ben il liût e la ribeche.
◆ A Gurize, par sierâ il cercli, se si va tal cjistiel de citât, si pues cjatâ une biele colezion di struments musicâi di stamp medievâl: ghirondis, arpis, tamburei, flauts, vielis e altris struments a cuarde, copiis cetant fedelis dai origjinâi. Si trate di manufats realizâts dal ensemble di musiche antighe Dramsam che si dediche cun competence e passion al studi de organologjie antighe.
◆ Museus e musiche, un binomi esistût di simpri e che il nestri Friûl al ten cetant di cont. Lâ e viodi par crodi. ❚