ATUALITÂT – LETARIS. Comunitâts montanis

Stant che o soi cjargnel e o ami profondementri la Cjargne, o ai let cun tante atenzion i articui dai gjornâi locâi saltâts fûr dopo de decision, cjapade dal esecutîf regjonâl, di comissariâ lis comunitâts montanis de nestre regjon, massime chê de Cjargne.
Al è evident che il nestri president cjargnel al vûl diferenziâsi di chei che antiviodint, cun fadie e afiet pe proprie tiere (M. Gortani, E. Moro, B, Lepre, tant par stâ ai prins che mi vegnin tal cjâf) a àn butadis lagrimis di sanc e di sudôr, fasint la lôr reson di vite il volê un autoguvier e une autodeterminazion pai distins de proprie tiere; la gloriose e fedele (ancje masse!) Cjargne.
I diktats dentri de sô maiorance a stan par vêle vinte e il «nestri cjargnel» al scuen ubidî ai ricats politics. Isal chest il tant propagandât federalisim, che si jemplin la bocje i leghiscj? Chest, a gno parê, al è un federalisim par ledrôs! Se o ai tuart, che cualchidun mi spieghi ce sorte di federalisim che al è chest, se si vûl sierâ une Istituzion come chê cjargnele che e va oltri la part stretementri aministrative, par altri positive sot ducj i ponts di viste, a scomençâ di chel finanziari. E no parcè che e je aministrade di esponents di centri çampe, ma parcè che e je un simbul stralusint de union di un teritori cu la sô int, ben plui profont e impuartant di cualunche «teoreme politic», e che nissun nol è in dirit di separâ o di dispierdi.
A la realtât cjargnele, fate di piçui comuns e paisuts, la Regjon e varès di ufrî dutis lis prospetivis di svilup che a nassin tal teritori, favorint sore dut i acorpaments e lassant plene facoltât di coordenament autonom a la Comunitât Montane, Ent intermedi, propit pes sôs peculiaritâts di teritori svantazât e di colegament cul mont todesc. Chest no par sierâsi, mancjarès!, ma par dâ rispuestis imediadis al tiessût sociâl e par valorizâlu. In sostance sul stîl dal Sud Tirol, par capîsi.
Doprant ducj i mieçs de democrazie, ma si scuen fâ une o plui manifestazions in place coinvolzint e mobilitant dute la popolazion, a partî dai piçui comuns jù, jù fin a Tumieç, Udin e Triest. Manifestazions che a àn di nassi no cui simbui dai partîts, ma cul unic simbul di «Cjargne tal cûr». Salacor no si otignarà nuie, ma ben il legjislatôr nol podarà dî che ducj a son dacuardi.
DINO TEMIL
Ruvigne