Rude e vûl fâi cuintri ae solitudin

“Vivi Ruda”, un progjet par tirâ dongje la comunitât e par fâi cuintri ae solitudin. Il progjet al è chel che il Comun di Rude al puarte indenant za di un pâr di agns in graciis de poie de Fondazione Friuli, miorant e infuartint i rapuarts sociâi dal paîs de Basse furlane cun gnûfs invistiments che a àn permetût al Comun di atirâ la atenzion ancje di realtâts fûr dai confins regjonâi. Dut al è scomençât un pâr di agns indaûr cuant che la aministrazion di Rude, cuntun contribût de Fondazione, e à fat realizâ un lavôr di ricercje, analisi e aprofondiment che al à puartât a stimâ une percentuâl jenfri l’11 e il 20% di popolazion che e je a pericul di solitudin. Si fevele di un grup di personis che al va di 180 a 340 unitâts: tra i plui colpîts, par diviersis resons, feminis, personis che a vivin di bessolis, personis no sposadis, disocupâts – cun mancul frecuence tes fassis di etât jenfri i 40 e 44 agns –, alte percentuâl di divorzis e veduis. «Si jerin rindûts cont – al spieghe il sindic di Rude Franco Lenarduzzi – che i paîs a cambiin cul timp e dispès al è il pericul che tante int e resti di bessole. Cui dâts tirâts dongje si à rivât a inviâ tantis iniziativis che a àn tornât a meti dongje lis personis: il pont par nô al jere chel di rivâ prime che la solitudin e puartàs la int ai servizis sociâi». E cussì al è nassût il grup “Planc ma ben” che si cjate par cjaminâ, “Un te alì di me” par tornâ a inviâ i rapuarts di vicinât, il “Laboratori de memorie” che al previôt une schirie di incuintris in paîs par contâ lis storiis de int de zone, dut in graciis di tancj volontaris che si metin a disposizion dai paisans: «O vin creât un dialic cui citadins, cu lis associazions e cu lis istituzions – al dîs Marco Giordani, coordenadôr dal progjet par cont de coop Co.S.M.O. – fintremai che o sin rivâts a di un vêr protocol su cemût frontâ e gjestî il probleme solitudin. “Viviruda” al è un sisteme atîf, basât su la ricercje, che al pues jessi espuartât, duplicât e adatât aes diviersis realtâts». La ultime biele iniziative e je la mostre itinerante di fotografiis “RacContare” che dai 15 ai 31 di Zenâr di podarà viodi in diviers locâi dal paîs: «L’ultin invistiment – al spieghe il sindic Lenarduzzi – al à interessât il recupar di un edifici public cuntun contribût di 800 mil euros: si doprarà par meti a disposizion alozaments par cui che al à bisugne, e intun plan si fasarà cualchi locâl par cjatâsi e par puartâ indenant ativitâts ricreativis». ❚