SLOVENIE. Lis mascaris di Carnevâl come puint parsore dal confin

A vuê no si sa inmò cuant che si podarà lâ in maniere libare di là dal confin, ator pe Slovenie. La sperance de vacine cuintri dal coronavirus nus lasse bielzà tacâ a fâ progjets, ma istès fintremai che la pandemie e larà indenant a spandisi cun fuarce o varìn di adatâ il nestri vivi aes prescrizions.
◆ Ancje se chest an si lu fasarà dal sigûr intune maniere diferente, nol mancje cuissà trop prime dai dîs che plui si fâs fieste par carnevâl. Pal solit o sin usâts a festezâlu come si devi, in tantis bandis dal Friûl.
◆ In Slovenie il carnevâl al è une vore inlidrisât te culture dal paîs e de int. Il gust di fâ fieste al è simpri chel, e in chest no son diferencis cul Friûl e cu la sô int. Tra i slovens forsit plui che tra i furlans, però, si à la fortune di viodi une vore di mascaris che a vegnin di tant lontan dal timp, di chê volte che i vons dai slovens di vuê a crodevin tes divinitâts paganis. Une vore di lûcs de Slovenie a àn mantignût chestis figuris de tradizion, ancje se oviementri par carnevâl tancj di lôr si metin sù mascaris plui contemporaniis.
◆ Tant che puint tra l’Invier e la Primevere, une volte ancje in Slovenie il carnevâl al durave de epifanie fintremai carnevalon; in dì di vuê, il plui dai events dal periodi di carnevâl si concentre tra la joibe grasse e il miercus de cinise. Clâr che ancje in Slovenie pal solit par carnevâl si bale, si sfile in mascare e si mangje robe buine, massime i krofi, che a saressin i krapfen par todesc e lis crofis par furlan.
◆ Cetant innomenât in Slovenie al è il carnevâl di Cerknica. Li, la joibe grasse (žagajo babo, vâl a dî “a sein la strie”) e par dute une setemane, il sindic al deleghe in maniere simboliche il podê ai Butalci, lis mascaris dal puest. Clâr che a Cerknica no tain pardabon in doi une strie, e chest mût di dî al sarès restât di une volte: lis maris a vevin bisugne di no vê intor di se i fruts par podê cusinâ in sante pâs, e cussì ur disevin di lâ fûr a viodi cemût che a seavin la strie. I fruts a jessivin e a restavin dut il dì ator cirint cheste strie che e vignive seade. Sore sere a tornavin a cjase ducj deludûts parcè che no vevin cjatât nuie dal gjenar, ma intant lis maris a vevin cusinât trancuilis.
◆ Di cualchi bande, li che vie par doi carnevâi no son stâts matrimonis, a puartin ator un tronc. Une varietât particolâr di cheste usance e esist te regjon dal Prekmurje, li che a metin in sene un matrimoni simbolic cuntun pin (par sloven borovo gostüvanje). Di altris bandis, lis mascaris a visitin i abitants dai paîs, a dislontanin i spirts triscj e a puartin ligrie e ridadis. Il kurent, par esempli, al è une figure dute pelose che e pare vie dut ce che al è mâl e che e puarte cun se gjonde e felicitât.
◆ In cetancj puescj, lis mascaris a zirin ancje a cubiis, cun cualchi significât. Dut al finìs tal miercus de cinise, cu la condane e il funerâl dal carnevâl. Al sarès tant ce dî sul carnevâl in Slovenie, che al à une vore di robis in comun cun chel di diviersis zonis dal Friûl-Vignesie Julie. Se il prossim an o larês a festezâ il carnevâl di cualchi bande venti là, nol sarà un câs se o viodarês cualchi mascare che e somee a chês za  viodudis ca di nô: ancje se magari si clamin intune altre maniere, dispès a somein a chês di cetancj paîs des Vals dal Judri, dal Nadison, de Tor, dal Cuarnap e di Resie. Mighe par nuie ancje alì, come in Slovenie, il carnevâl si clame pust. ❚