I PROTAGONISCJ – Il sensâr de pâs tra il pape e l’imperadôr Barberosse

Ulrì di Treffen (o Voldarì, o Uldarì; par todesc Ulrich, par latin Voldoricus de Treven) al è patriarcje di Aquilee dal 1161 al 1182 intun moment dificil. L’imperadôr Fidrì I Barberosse al è in lote cuintri dal pape Alessandri III. Vignesie e Grau a son cul pape. Ulrì sul imprin si met de bande dal imperadôr Fidrì te sô lote cuintri dai comuns de Italie, e il pape lu scomuniche. Dopo dal disfortunât atac a Grau, dulà che al è fat presonîr dai venezians – come che al è contât achì parsore –, il so ategjament al è plui diplomatic e par agns al pendole tra il Barberosse e Alessandri III, ma simpri cun chê di cirî i interès dal so patriarcjât. Di fat Ulrì, ancje se todesc, no si somet ae strategjie imperiâl come i patriarcjis prin di lui ma, simpri par puartâ aghe ae sô gnove Patrie, a planc a planc si svicine al pape che al aprove, dome tal 1169, la sô elezion a patriarcje. A Ulrì i tocje però frontâ la sô int furlane.
◆ Di fat, la asse cuintri dal pape e jere fuarte te Patrie. Si conte che vie pe funzion de Sabide Sante dal 1169, te basiliche di Aquilee, cuant che il patriarcje Ulrì, tal benedî il ceri di pasche, al fasè il non dal pape Alessandri, al tacà un davoi, un vosarili te glesie e une vore di int e bandonà la basiliche. Ae fin, lui al sarà il sensâr de riconciliazion tra il pape e l’imperadôr. Cumbinade la pâs tal 1177 jenfri i doi nemîs, Ulrì si impegne par viodi des cuistions de Patrie. Al comede lis vertencis cun Grau che i lasse la paronance des diocesis istrianis, des tieris tra la Livence e la Plâf e des relicuiis puartadis vie di Popon. Al è impegnât tes lotis tal ducât di Carinzie, al clame dongje un sinodi a Aquilee, al è tal Concili Ecumenic tal Lateran, al implante la gnove diocesi di Cjaudistrie, al consacre la gnove catedrâl di Padue, al burìs fûr gnovis costituzions pal Cjapitul di Aquilee, cun regulis claris pai cjalunis, cul oblic di vivi insiemi, cun viestis e renditis compagnis par ducj. In ultin, si à di ricuardâ che al è propite Ulrì a fa piturâ il cicli maraveôs di afrescs de cripte de basiliche di Aquilee, scomençant de sene di Sant Marc che al presente Sant Ermacore a Sant Pieri, che o podìn amirâ ancje in dì di vuê. Al è soterât te sô basiliche denant de capele dai Torians, e la piere che e tapone la sô tombe e je ancjemò alì. ❚