“Mestre Emilie, îr che e jere Joibe grasse o soi lât in mascare ator par Aquilee e o soi lât ancje là di gno nono Gusto.” “Benon, Sandri, e tropis fritulis âstu mangjât?” “Une vore, mestre! Ma gno nono mi à contât che une volte, di Joibe grasse, a Aquilee a lavin in mascare ancje i grancj e che si divertivin un grum! Mi à dit che a lavin ator cuntun bo, un bo vêr e vîf, cui cuars luncs, e che al jere dut plen di flocs di ducj i colôrs. A lavin pes cjasis e ducj ur davin alc di mangjâ o di bevi. E po dopo, fieste di ligrie. I ai domandât al nono parcè che a lavin ator cul bo e lui mi à rispuindût che e jere une usance antigone e di domandâtal a ti che tu sês mestre di furlan e che tu sâs dutis lis tradizions” “Sandri, jo no sai dut, ma in chest câs tu âs intivât just. O ai pene finît di lei un libri che al fevele propit di cheste tradizion, che si fâs inmò a Grau, cuntun bo di cjarte pestade clamât “il manso infiocao”, e a Vignesie ancjemò plui in grant.” “Ce ben, mestre, contimi alore.”
◆ “La usance, Sandri, e nas par ricuardâ un câs par nuie biel par Aquilee. Tancj agns indaûr, o sin te Ete di Mieç, di precîs tal 1161, l’imperadôr Fidrì I Barberosse al nomene patriarcje di Aquilee Ulrì di Treffen. Cundut che chest al sarà par plui di vincj agns un patriarcje brâf, tal imprin, tal 1162, al fâs une falope.” “Ce aial cumbinât, mestre?” . “No si sa parcè, no i à saltât sù di concuistâ Grau!” “E lu à fat, mestre?”. “Po no po! Cundut che al someave in buinis cun chei di Grau. Propit no si capìs parcè che lu vedi fat, intun moment dificil. Grau al jere dai venezians che a jerin de bande dal pape Alessandri III e cuintri dal imperadôr Fidrì Barberosse. Ulrì al jere de famee di Treffen, come il patriarcje Popon, e ancje chel al veve metût a sac Grau nuie mancul che dôs voltis” “Vûstu dî che i Treffen a vevin in asse Grau?” “No sai, ma il piês al è stât che, intant che al jere a Grau, il dôs di Vignesie Vidâl Michiel al è rivât dal mâr cu lis sôs galeris e al à cjapâts presonîrs il patriarcje Ulrì, 12 cjalunis e 12 cjastelans furlans!” “E ce petenade, mestre, che a àn cjapât dai venezians!” “Ma no je finide, Sandri. Michiel ju à puartâts a Vignesie in cjadenis, tant che cjans. Ur àn fat tressâ la place di S. Marc, tal mieç de int che ju sbeleave, che e vosave e che e rideve. Propit te Joibe grasse!” “Ma mestre, o ai capît de brute venture di Ulrì… ma il bo, ce jentrial?”
◆ “Tu âs di savê che, par jessi molâts e par podê tornâ in Friûl, il patriarcje al scugnì firmâ un tratât umiliant. Ulrì si impegnave a mandâ ogni an a Vignesie, te dì de Joibe grasse, un bo, 12 purcits gras e 12 gruessis pagnochis di pan. Al è clâr che il riferiment al jere al patriarcje (il bo), ai cjastelans (lis pagnochis) e ai cjalunis (i purcits). Di in chê volte ae fin de Republiche di Vignesie, ogni Joibe grasse si faseve une fieste che e veve un significât politic fuart: in place S. Marc, cuntune fulugne di int, si taiave il cjâf al bo, si scuartavin i purcits e si devin lis pagnochis ai presonîrs, che almancul a carnevâl a mangjassin ben. Ma no je finide. Dopo di vê copadis lis bestiis, il dôs in persone al jentrave in procession tal palaç ducâl e cuntune mace al sdrumave 12 piçui cjistiei di len che a rapresentavin chei dai cjastelans furlans.”
◆ “Joi, ce brute robe! E ce tristerie che e veve Vignesie cun nô!” al salte sù Sandri. “Ai venezians ur secjave il podê dal patriarcje di Aquilee – e zonte la mestre – Za in chê volte si lambicavin parcè che la paronance dal patriarcjât e rivave fin tal mâr. Par secui lis provaran dutis par puartâi vie Maran, Triest e la Istrie. Ae fin, magari cussì no, tal 1420 a rivaran a concuistâ dute la Patrie.”
◆ “No je une biele storie – al dîs il fantacin cu lis orelis sbassadis – ma mi à sclarît alc. Ma tu vevis dit, mestre, che fûr di cheste falope Ulrì al è stât un patriarcje brâf, no mo?” “Sigûr, Sandri! Intant, par agns al rive a barcjemenâsi jenfri l’imperadôr, che lu veve nomenât tant che princip de Patrie, e il pape, che lu veve sielt tant che so legât. E lui al da un bot al cercli e un al caratel, cence scontentâ nissun. Cul so ecuilibri al rive, ae fin, a fâ di sensâr jenfri i doi gjai e al cumbine di fâju cjatâ a Vignesie tal 1177.” “E àno fate pâs, mestre?” “Ti conti, Sandri. Il pape, che si clamave come te, al spietave l’imperadôr Fidrì su la puarte de basiliche di S. Marc e alì si son dâts la bussade de pâs. Po dopo a son jentrâts in glesie pe messe.” “E il nestri Ulrì, jerial?” “Il nestri patriarcje al jere sentât propit dongje dal imperadôr e i voltave par todesc il discors a man a man che il pape lu diseve par latin.”
◆ “E a Aquilee?” “Cuant che al è tornât te Patrie i àn fat une grande fieste, ancje parcè che Ulrì al veve puartât cjase une vore di vantaçs pal patriarcjât. Al à aministrade ben la Patrie e – par sierâ, che subit e sune la campanele – prime di murî al è rivât ancje a fâ pâs cun chei di Grau, che a àn ricognossût che i tesaurs e lis relicuiis di Sant Ermacore che il patriarcje Popon al veve fiscât a Grau a podevin restâ a Aquilee. Si pues alore dî che Ulrì, dopo de umiliazion dal bo e dai purcits, pardabon… al à cjapât il taur pai cuars!” ❚
