ATUALITÂT – INCHIESTE La scuele – 2. Materiâi produsûts des scuelis: dulà vano a finî?

La scuele e je aromai tacade e la programazion didatiche pronte, o daûr a perfezionâsi. Si preparin lis ativitâts e i cors che si davuelzaran vie pal an e, jenfri chescj, ancje chei di lenghe furlane. Come che o vin spiegât plui voltis, lis scuelis a puedin meti in vore progjets mirâts in gracie di finanziaments statâi (L. 482/99) e regjonâi (L.R. 3/02). La ultime scjadince e je stade propit tal mês di Setembar stât: lis scuelis primariis e secondariis di prin grât de regjon a vevin timp fin ai 18 par presentâ la lôr domande di contribût. Jenfri i criteris par ripartî i fonts a ‘nd è cualchidun di interessant, tant che il sburt par che lis scuelis a lavorin in rêt e par che a doprin la lenghe di minorance come lenghe veicolâr. Pai istitûts che a declarin di produsi materiâl e di condividilu, al è previodût un finanziament di pueste cu la specifiche che e sei rispietade la grafie uficiâl de lenghe furlane.
LA RACUELTE_ Une volte finît il progjet, cuant che lis scuelis a mandin al Servizi identitâts linguistichis, culturâls e coregjonâi tal forest de Regjon lis cjartis de rendicontazion, a àn di alegâ ancje une copie dal materiâl produsût. Dut ce che al è tirât dongje daspò al ven puartât te sezion furlane de Biblioteche civiche V. Joppi di Udin, di mût che al puedi jessi consultât di ducj: utents, mestris, students. La idee e je chê di creâ une bancje di dâts utile soredut ai insegnants, che a puedin confrontâsi cun ce che al è za stât fat e magari evitâ ripetizions e produsi alc di gnûf.
INFORMAZION, IL SOLIT PROBLEME_ «In Biblioteche fin cumò a son rivadis dôs butadis di materiâi» nus à spiegât la dotore Marzia Di Donato responsabile de Sezion Furlane. I materiâi produsûts des scuelis primariis a son stâts trasferîts te Sezion pai Fruts, chei des scuelis mediis invezit a son restât te Sezion Furlane e a son ancje consultâts dai utents. Cundut che la cualitât e je alte, sedi par contignût che pe forme grafiche, i prodots des scuelis primariis no vegnin consultâts cuasi di nissun. Il probleme al pues jessi leât al fat che la int no ju cognòs, la Biblioteche ju à ancje metûts in mostre ma il sucès al è stât bas. Ce che al stupìs al è che il materiâl nol sei consultât nancje dai insegnants che a son daûr a preparâ un gnûf progjet. Al torne fûr ancje achì un probleme za nomenât tantis voltis, chel de informazion scjarse sedi su la distribuzion dai materiâi, sedi sui gjenars di prodots a disposizion. E pûr i mieçs par tirâ dongje lis informazions no mancjin, Internet al à dât une grande man in chest, ma nol è suficient. Di fat, la plui part dai insegnants sintûts no sa che e je cheste pussibilitât, no sa che il materiâl al è a disposizion di ducj in biblioteche, ancje se ducj a àn preseât la iniziative e a pensin che al sei fondamentâl creâ un archivi di dut ce che al ven produsût. La consultazion e permet, di une bande, di evitâ che scuelis difarentis a fasin lis stessis robis an daspò an (par esempli voltâ lis stessis flabis), di chê altre, di cjapâ a model alc che al è za stât fat par po fâlu cressi e aprofondîlu, par inricjî il progjet che si à za tal cjâf di meti in vore. Al è clâr che la comunicazion no je eficace, almancul cemût che e je stade impuestade fin cumò, se di no no si spieghe cheste «lacune».
LA SPERANCE_ Daûr dal argoment dal progjet al ven po disvilupât il materiâl di pueste, si va des schedis didatichis aes monografiis su argoments specifics, des ricercjis sul paîs a chês di storie, dai glossaris ai dissens e aes ilustrazions des storiis. L’impuartant al è creâ alc di concret, che al reste, ancje par fâ cressi l’interès dai students. Sperìn che dutis chestis voris no restin intun scansel ma che il tentatîf di creâ un archivi al vei sucès, pal disvilup stes de didatiche in marilenghe e pe autoformazion dai nestris insegnants.
Federica Angeli