Sfuei Mensîl Furlan Indipendent
Archivi de Patrie

La grande corse ae energjie verde

Barbara Cinausero

“Leç su la espansion edilizie rinovabile” (Erneuerbaren-Ausbau-Gesetz = EAG), une scrite paurose che dut câs e puartarà in curt a un cambiament sostignibil de Austrie. Cheste leç e varès di jessi, in Austrie, une specie di cjamp di base par un passaç bande une energjie sostignibile e par fissâ par fîl e par pont i plans di incentivazion e i indreçaments che a varan di stâ daûr di chest sburt a une espansion de energjie eoliche, fotovoltaiche, idriche e a biomasse.
◆ Il travuart al è cetant ambiziôs: dentri dal 2030, la Austrie e varà di cuvierzi il 100% dal so dibisugn energjetic midiant di fonts di energjie rinovabile. Il sparagn energjetic di bessôl nol baste plui, e la dibisugne di espansion energjetiche e je grandonone: dentri di dîs agns a varan di jessi dâts dongje inmò 27 Terawatt/ore – sù par jù un tierç dal consum energjetic dal dì di vuê – a emissions zero. La leç e jentrarà in vore il prin di Zenâr dal 2021 e alore nol reste masse timp; cun dut achel, il ministri austriac nol à inmò presentât nissun plan.
◆ La Carinzie e prodûs bielzà cuasi il 100% de sô energjie tacant di fonts rinovabilis. Bisugne jessi agrâts di chest aes gjenerazions che a àn aurît in maniere fative des fonts rinovabilis de regjon: la trasformazion de aghe in “aur blanc” intes centrâls idroeletrichis e à fat de Carinzie, za di desenis di agns, la pioniere de eletricitât verde. Ma a son gloriis aromai avonde stanticis, par vie che nol è vignût daûr cuasi nuie di impuartant. Se intai agns ’50, ’60 e ’70 cetantis valadis a forin sacrificadis ae dibisugne simpri plui grande di energjie eletriche che e dave daûr ae incressite de industrie, vuê a bastin un pâr di turbinis eolichis e implants solârs par tignî in brene la politiche.
◆ La Carinzie, stimade tant che esempli di Land pe energjie verde, e à mancul pussibilitâts di ce che si pense par podê sburtâ e sveltî ancjemò la svoltade energjetiche in Austrie. In sostance, si domandisi se la politiche e pense di podê fâ cont dome sui cuvierts des cjasis e su cualchi altre risierve eoliche tant che contribût ae espansion des energjiis rinovabilis nazionâls, sparagnant dut il rest. Une biele idee? No dal dut! Se il probleme al tocjàs dome la Carinzie, al sarès facil. Ma, stant che al rivuarde dute la Austrie, si varès di fâ come 60-70 agns indaûr, cuant che si sburtave cetant su la energjie idriche, ma in dì di vuê al è impensabil. In sumis, ancje lôr le pensin come pardut: si à di fâ, ma no dal gno “zardin”.
◆ Scomençâ a doprâ soreli e vint par fâi cuintri al cressi de dibisugne energjetiche al larès a pro di tancj, ancje de economie: un setôr intîr de regjon al è avodât dal dut ae energjie solâr. Ancje lis turbinis eolichis no saressin un grant savoltament, par vie che la lôr instalazion no je permanente e, se dal câs, si puedin rimovi facil. Ben clâr che ducj i intervents sul paisaç a van pensâts une vore, ma cence di lôr no si podarà lâ indevant, se si pense di rivâ al 100% di energjie verde, cun sigurece e par fâur cuintri ai mudaments dal clime. Par dut chest, lis sperancis che a divegnin de leç che o vin fevelât a son une vore grandis. Bisugnarà sburtâ il grant potenziâl dal fotovoltaic e de energjie eoliche che la Austrie e cjape dentri, ma chest al prossume ben clâr cetancj invistiments (si pense a 25 miliarts di euros) e cence mancul di disvilupâ une suaze legjislative adate, e di mudâ la mentalitât de int e de politiche in gjenar. Visìnsi che la energjie nete no ven in mût facil de prese di corint, ma de nature, e o bramìn che lis autoritâts politichis a savedin cjatâ un bon ecuilibri jenfri il disfrutament dal ambient e la tutele dal clime. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +