La prime stagjon dal teatri stabil furlan a è pronte a partî

Come une mari al so prin part, Paolo Patui, diretôr artistic dal TSF, al compagne cun voli passionât la nassite dai spetacui de prime Stagjon teatrâl dal Stabil Furlan. A diference dal Giovanni da Udine, che al ospite spetacui preparâts des miôr compagniis teatrâls di dute Italie, il Stabil al prodûs in cjase lis rapresentazions plui impegnativis di fâ viodi al so public: un lavôr lunc, delicât, che al scomence cul sielzi il test, il regjist, i atôrs; fâ lis provis; preparâ costums, senis, lûs, musiche; debutâ a Udin, te sô sede, e po fâ circolâ il spetacul tes salis dal Friûl e altrò.
◆ Ve ca i spetacui sielzûts pe prime Stagjon dal Stabil Furlan, ven a stâi la Stagjon teatrâl 2020-2021:
– “Giorgio Mainerio, un misteri furlan” di Marco M. Tosolini e Paolo A. Simioni.
– “La casa. Lagrimis di aiar e soreli” di Siro Angeli.
– “La gnot di Aquilee” di e cun Fabiano Fantini, Elvio Scruzzi, Claudio Moretti e Claudio de Maglio.
– “Tutti su per terra” di e cun I Papu, Andrea Appi e Ramiro Besa.
– “Fradi, dunà setu?” di e cun Doro Gjat.
La preparazion dal prin spetacul – “Giorgio Mainerio, un misteri furlan” – e je scomençade, par cure de Arlef, prime che il TSF al fos operatîf, stant che il debut al veve di jessi fat al Mittelfest, tal mês di Lui, ma al è stât spostât ai 13 di Setembar par colpe dal Covid. Arlef, une dai fondadôrs e finanziadôrs dal TSF, e consegne il spetacul ae sô creature pes presentazions a Udin e ator pal Friûl. La vicende di Mainerio, predi e musicist tal Friûl de seconde metât dal 1500, e ven presentade cun musiche antighe dongje di chê eletroniche, filmâts, atôrs che a contin la sô vite esaminade di un incuisitôr che lu suspiete di necromanzie. Risultât: il ritrat di un musicist gjeniâl e di un predi insolit.
◆ “La casa. Lagrimis di aiar e soreli” di Siro Angeli, scritôr di teatri, senegjatôr pe television, operadôr culturâl, atôr e poete. Il test al è stât componût par talian tal 1937 e rapresentât l’an dopo a Firenze. L’autôr, nassût a Cesclans, al ambiente une storie dramatiche, di valôr universâl, intune Cjargne di miserie e di dignitât, li che si consume un sacrifici trement e inesorabil; ma il finâl misurât e tenar al fâs intuî un segnâl di rinassite. Adatament e traduzion di Paolo Sartori, Paolo Patui e Carlotta Del Bianco, che e je ancje regjiste. Dopo un avîs public, une part dai atôrs e je stade sielzude midiant di provins. La vicende, costruide cun grant mistîr e sensibilitât di bande di Siro Angeli, la dedizion che Patui e la regjste a metin tal tratâ ogni particolâr de produzion, lis emozions che la trame e trasmet: dut al fâs pensâ che chest spetacul al sedi il fulcri de Stagjon teatrâl dal TSF.
◆ “La gnot di Aquilee”, di e cun Fabiano Fantini, Elvio Scruzzi, Claudio Moretti e Claudio de Maglio, e nas di une elaborazion durade agns intor di un sogjet di grande impuartance te storie dal Friûl: i mosaics conservâts des cjasis di Aquilee antighe, cun figuris de Bibie, ma ancje cun dissens complicâts, stravagants, incomprensibii, vignûts fûr di cjâfs rafinâts e complicâts. Ce capivino i operaris musivarii, i mosaiciscj, artesans cence grande istruzion, che a fasevin il lavôr cu lis tessaris (i cuadrei) di marmul colorât o di veri? Rispuindint ae domande, i autôrs a àn mût di rindi lizêr e simpatic un argoment che al à tormentât studiôs di valôr; e di fâ rivâ a ducj un invît amabil a volê ben ae nestre storie e magari a visitâ Aquilee e i siei mosaics. Il contat vût cul public cu lis rapresentazions provisoriis al à judât a componi un test definitîf madûr e brilant, che in bocje di atôrs babios – come chei che lu àn scrit e lu recitin – al devente esplosîf.
◆ Lis dôs seradis dai Papu e di Doro Gjat, artiscj afermâts tant che intratignidôrs gjubiâi e ferbints in lenghe furlane, a prometin di jessi moments di divertiment legri e cence pinsîrs. La arguzie comiche dai Papu e la braùre di rapper e cjantautôr di Doro a documentaran la varietât, ancje linguistiche, des espressions artistichis che a sflorissin in lenghe furlane in dì di vuê.
◆ Ae fin di Setembar, i abonaments ae Stagjon interie o a cumbinazions di seradis a saran metûts in vendite pes presentazions planificadis te sale dal Giovanni da Udine. Cui che i ten ae lenghe furlane sul palc – fevelade,  declamade, celebrade – e a viodi spetacui biei, di tai professionâl e di argoment tiessût ator dai nestris fogolârs, al fasarà onôr ae propueste dal TSF, che nol à di vivi dome di contribûts publics ma ancje de amicizie e dal aiût dal so public. La circolazion dai spetacui tes salis ator pal Friûl e sarà conciertade dal Ert.
◆ Plui informazions sui spetacui e su lis datis a son disponibilis sui social Facebook e Instagram dal TSF, li che ducj a puedin comentâ lis sieltis fatis; e, de fin di Setembar, sul sît dal TSF.
◆ Il TSF al à programât altris ativitâts impuartantis, di svilupâ te Stagjon 2020-2021, sedi di bessôl che in colaborazion cun altris, che o contarìn tal prossim numar de Patrie dal Friûl.  ❚