Di là dal clap

Nus va ben che la Regjon, Gurize e Triest a vedin rapuarts cu la Slovenie e lis citâs slovenis di confin. No nus va ben, invezit, che, di bielzà un toc di timp in ca, chescj rapuarts no ju vedi il Friûl intîr e lis sôs rapresentancis istituzionâls. No dome cu la Slovenie, ma ancje cu la Carintie. Cheste politiche estere, nobil pal Friûl, e va frontade di pet. La Glesie furlane di bielzà lu fâs cun chê slovene di Lubiane e cun che carintiane di Clanfurt : baste ricuardâ lis grandis celebrazions religjosis che ogni an si fasin sul Lussari e a Madone di Mont. Ogni tant si cjatin ancje associazions, impresis, sindacats dai lavoradôrs sedi dal Friûl, che de Slovenie e de Carintie. Cussì a fasin ancje i Comuns e lis rapresentancis des valadis dal Nadison, de valade de Tor, dal Cjanâl dal Fier e de Cjargne. Par ultin, nol va dismenteât – parcè no ? – la fuarte presince austriache ae sagre dal mangjâ e dal bevi di Friûl Doc.
Ma ce che al mancje e je une strategjie complessive di svilup permanent dai rapuarts cui nestris confinants dal vieri Patriarcjât di Aquilee. Pal avignî di cheste Europe di vuê. Il Friûl che nô o volìn, al à di jessi cussient de sô identitât storiche, linguistiche e culturâl, fondade su la autonomie e sul autoguvier. Chest Friûl, cheste nestre int, a àn di vê rapuarts direts cu lis istituzions e i popui che nus stan dulintor, par convivi insiemit al miôr, par cognossisi e rispietâsi simpri di plui, par valorizâ al massim lis nestris diviersitâts come ricjecis di gjoldi e no di combati. Cussì fasint a scomençarès a nassi pardabon e dal bas, cu la poie de int, la Euroregjon tra Friûl, Slovenie, Cravuazie e Venit, che e pues deventâ une fuarte e grande realtât te suaze de Union European.
Par chest, daspò de jentrade ancje de Slovenie te Union Europeane, o valutìn un grum ben la propueste de Universitât dal Friûl di meti adun une grande cunvigne internazionâl tra furlans, slovens e carintians vierte aes rapresentancis istituzionâls, religjosis, sociâls, culturâls e dal mont dal lavôr e des impresis. Che e varès di coventâ a meti in vore un fuart plan strategjic di pâs, di amicizie, di colaborazion tra i popui di cheste part di Europe.
Curtis e che si tocjin. Par dâ cuarp e prospetivis a chest dissen strategjic, sarano dacuardi di movisi cun decision e impegn lis istituzions dal intîr Friûl, a partî de Comunitât des Provinciis furlanis?