Trop furlan isal Bibion?

“La stragrande maggioranza della popolazione autoctona parla la lingua friulana nella variante del basso Friuli occidentale, mentre un’esigua minoranza usa il dialetto veneto”. A sunin un pôc strambis lis peraulis cjatadis tal sît internet dal Comun di San Micjêl dal Tilimint, biel che cu la machine si cor ta la strade provinciâl a sud di Morsan dal Tilimint. Dut a bot tun cartel si lei “Veneto” e “Venezia”: o sin jentrâts tal teritori di Sant Micjêl. In font, il mâr e Bibion, “il 3° polo balneare della Penisola”, ancjemò come che si lei sul sît dal comun.
DI LÀ DAL TILIMENT_ Ma Sant Micjêl isal Friûl? Secont la sô int sì, tant ben che di tancj agns a vuelisn gambiâ regjon e tornâ ta la Patrie dal Friûl, li che a jerin fint al domini di Napoleon. Ma i referenda fin cumò organizâts no àn puartât une clare maiorance par tornâ in Patrie. Se tal cjâflûc Sant Micjêl la int e je ben convinte par passâ dibot in Friûl, a Bibion lis robis no son cussì claris.
I LOVE PORDENONE_ Leint i risultâts dal ultin referendum dai 29 e 30 di Mai dal 2005 (falît pal quorum masse bas), i sì pal Friûl a àn vinçut in maniere clare a Sant Michele, ma no a Bibion. Par un quorum di plui dal 40 par cent in dibot dutis lis sezions (cul massim di 65 ta lis frazions di Vilegnove da la Cartere e Malefieste), a Bibion la parcentuâl e je stade tra il 37 ed il 38 par cent. “E pûr lâ sot di Pordenon nus sarès util – al dîs Fabrizio Chinellato, paron dal ristorant-pizerie Milano –. Par fâ dôs cjartis a Vignesie i metin mês, a son parâts sot da la burocrazie”. Sot da la ploie di Jugn, che e à ruvinât la partence da la stagjon turistiche, i parons dai bar, hotel e ristorants a àn gust di cjacarâ su chel che al podarès jessi e ancjemò nol è. “Il referendum – e zonte la sô femine Rita – al è stat sdrumât di chei des piçulis frazions di Sant Micjêl, che a son plens di pôre di lassâ Vignesie”.
FURLANS DAPARDUT_ In fin di dut, al pâr bon che, plui di tornâ ta la Patrie, la int di Bibion e varès gust di vê la autonomie da la regjon Friuli – Vignesie Julie e, specialmentri, la union cun Pordenon. Bibion al podarès jessi la sole localitât turistiche «internazionâl» dal Friûl ocidentâl. Tal Venit a son ancje Caorle, Jesolo, Eraclea e, clar, la grande Vignesie. Paraltri, lis stradis di Bibion a son plenis di furlans, miscliçâts insiemit a todesc, ongjarês e padovans. “O ven ca par li termis – e sclarìs une siore –, che a son miôr di chês di Lignan”. Tantis personis a vegnin di Feagne, Udin, Tresesin e Pordenon. A pet di “Sabbiadoro”, Bibion e coste ancjemò un pôc mancul, ma ta la vie principâl a son daûr a vierzi i prins locâi par “vips”, che a somein tant a chei di Lignan da la “dolce vita” di Pinede.
UNA LENGHE PAR CONSTRUÎ_ E tropis personis fevelino par furlan a Bibion? Pocjis in veretât. “Io non parlo il friulano – al dîs Stefano Ros dal hotel Palma de Majorca, bibionês doc –, ma mia moglie e anche i suoi familiari sì”. Ma lis lidrîs furlanis si cjatin dulà che no si pense che a podaressin jessi. Par esempli ta la edilizia, cun tantis da lis cjasis e palaçs che a son stâts tirâts sù di muradors furlans: baste pensâ a la imprese di Paolo “Pauli” Boscariol di Sant Zuan di Cjasarse, che tra i agns ’50 e 60’ al à fât sù vilutis ancjemò dopradis a Bibion.
TORNÂ A LA AGHE_ In place Zenith, e svintule la bandiere cul leon di Sant Marc. Cjaminant sul savalon, si rive al ferâl in bande da la fôs dal flum. E ven sere, e di là da la aghe si viodin lis lûs di Lignan. In fin dai fats la diference tra Friûl e Venit, tra Vignesie e Udin e Pordenon e pues jessi piçule come il jet dal Tiliment che si bute tal mâr. Dusinte metris o sin di ca, dusinte metris o sin di là. Bagnâts da la stesse aghe, cuintri il stes mâr.