AI 32 DI MAI. La matematiche e la art di bevi un aperitîf

Al è ator cualchidun che al pense che i furlans no sedin cussì tant lavoradôrs come che a disin, cun dut il timp che a passin tal bar. Nuie di plui falât, e cumò us al dimostrarai.
Cuâl isal l’aperitîf furlan par ecelence?
Lu san ancje i claps (soredut chei claps che a son poiâts dongje di une ostarie): l’ «un par doi». Ma si sêso mai domandâts il parcè? Al è clâr: parcè che il furlan al à simpri passion di lavorâ, e cul un par doi al lavore ancje cuant che al polse.
Lin par ordin.
L’un par doi (pardabon covential che us al displei?) si lu fâs cun «Gingerin» e vin blanc. «Un» al è il Gingerin, «doi» chei che a àn di bevi, duncje lis tacis: si divît il Gingerin tes dôs tacis, e dopo cul vin blanc si implene chel che al reste de tace (e in chest câs, nol jentre se il furlan al è otimist o pessimist: la tace e va jemplade dute, no dome mieze).
Duncje, l’un par doi al è dome par doi di lôr. Se invezit a bevi a son in cuatri, e covente un pocje di matematiche: si puedin ordenâ «doi un par doi», ma al sune mâl a dîlu. Cussì, il vêr furlan al scomence cui calcui, e i doi un par doi a deventin un doi par cuatri, secont la distribuzion de moltiplicazion: b/2x(1×2), plui semplicementri (b/2)xb, dulà che «b» al sta pal numar di bevidôrs.
Dut ben, fin che lis personis che a bevin l’aperitîf a son in numar pâr.
Sîs personis? 6/2×6: trê par sîs.
Vot? 8/2×8: cuatri par vot.
Viodêso? Il furlan nol polse mai, nancje tal bar! Lui al à simpri di lavorâ, di calcolâ, di mateâ cul çurviel.
Ma la vere dificoltât e rive cuant che chei che a bevin a son in numar dispar: ce si fasial? Un Gingerin di dividi par trê, cussì al ven fûr plui vin te tace (un par trê) o ben doi Gingerins par trê tacis, che a lassin mancul puest libar pal vin (doi par trê)?
Cumò si capìs miôr parcè che l’un par doi al è l’aperitîf dai furlans: parcè che no ju lasse rilassâsi mai. Al è il furlan che al à di sielzi la dose di meti, cussì al è sì un client, ma tal stes timp al è ancje un pôc ustîr, duncje lavoradôr. E cun chê storie dal un par doi si displee ancje l’inzen che a àn i furlans tal sparagnâ: usâts come che a son a fâ di cont, no ur scjampe nancje un franc.
Eh, sì: la vite in Friûl e je dure par chei che no àn imparât a memorie lis tabelinis, di piçui: simpri a sintîsi ignorants intun mâr di sienziâts, e obleâts a ordenâ simpri e nome spritz.
BETE DI SPERE