Predis al è un film di Massimo Garlatti-Costa, produsût di Raja Films e Belka Media e realizât cu la poie di Arlef – Agjenzie Regjonâl pe Lenghe Furlane, Fondo Regionale dell’Audiovisivo del Friuli-Venezia Giulia, Film Fund – Film Commission Friuli-Venezia Giulia, Glesie Furlane.
«Lis ripresis a son duradis plui di un an – al conte il regjist Garlatti-Costa -, ma lis dificoltâts a son stadis te costruzion dal documentari, di fat Predis al è stât forsit il plui dificil che o vedi mai fat. La dificoltât e je stade chê di pensâ cemût contâ storiis biografichis e rindilis vivis. Une altre dificoltât intal film, ancje se si fevele di personis dal Nûfcent, e je stade chê di cjatâ materiâl audiovisîf e fotografic di cualitât».
Oltri a un struc de lôr vite e a ripuartâ passaçs significatîfs dal lôr pinsîr, pre Marchet, pre Placerean e pre Beline a son stâts contâts di “testimonial” che ju àn vûts cognossûts: Eddi Bortolussi, Lucio Peressi, Giacomo Viola, Antonio Colussi, Celestino Vezzi e Angelo Floramo. «I intervistâts ju vevin vûts come insegnants e amîs e o volevi che a contassin la part intime, personâl, umane dai trê predis, la part forsit mancul cognossude, ma che e identifiche i oms».
La prime di Predis e sarà inte suaze dal Festival Suns Europe, vinars ai 29 di Novembar, aes 21, a Udin, tal cine Centrale; po dopo al sarâ distribuît intai cines di dut il Friûl prime di Nadâl. ❚
E.A.