Ai 7 di Novembar al tache il prin cors di formazion
par aministradôrs dai Comuns di aree furlanofone
Diretîf gnûf pe Comunitât Linguistiche Furlane, che di Lui passât il president al è il sindic di Voleson Darzin Markus Maurmair. A fasin part de clape il vicepresident, elet in maniere direte de Assemblee dai Sindics, Alessandro Marangoni, sindic di Dartigne, Ornella Comuzzo, assessore di Tavagnà, Alessandra Vanone, assessore di Tresesin, e Daniele Sergon, sindic di Caprive.
«I Comuns che a àn aderît cun at deliberatîf dai propris Conseis a son 119 e o sin daûr a tignî diviers contats cu lis aministrazions comunâls che in dì di vuê no àn inmò deliberade la adesion, pal plui par vie de bataie de legjislature passade su lis Uti, cuant che buine part dai Comuns che a fasevin ricors no vevin deliberade la lôr adesion viodût che la norme costitutive de Comunitât Linguistiche Furlane e je la stesse che e istituive lis Uti – al sclarìs Markus Maurmair -. Vuê, vignude mancul la motivazion legâl, la sperance e je che si rivedi a une partecipazion plene e convinte. Un auguri al è che a partecipedin realtâts tant che Pordenon, Spilimberc, Cividât, Manzan o Codroip, par dâ la rapresentance teritoriâl complete ae istituzion che e je destinade ae valorizazion e ae difese de coesion teritoriâl, sociâl e economiche de comunitât linguistiche furlane».
Intant «a son partîts i progjets che a rivuardin di une bande servizis essenziâi pai fins istituzionâi, tant che la ativazion di un portâl internet, e a son stadis elaboradis propuestis indreçadis ai aministradôrs comunâi e aes lôr struturis. Di fat, in graciis dal supuart de Universitât dal Friûl e in particolâr dal Cirf, il Centri interdipartimentâl pal svilup de lenghe e de culture dal Friûl, e in gracie de colaborazion de ARLeF, la Agjenzie Regjonâl pe Lenghe Furlane, ai 7 di Novembar al tacarà il prin cors di formazion par aministradôrs dai Comuns di aree furlanofone pal aprofondiment di normativis e formis contributivis pe tutele e pe valorizazion des minorancis linguistichis. E sarà une ufierte formative distribuide sul teritori che e viodarà interessadis, fin ai 6 di Dicembar, cinc aministrazions comunâls: Tresesin, Caprive, Palme, Tumieç e Spilimberc».
Par informazions, si pues contatâ il Centri interdipartimentâl pal svilup de lenghe e de culture dal Friûl al numar 0432/556480-556486 o ben scrivi un messaç di pueste eletroniche ae direzion: cirf@uniud.it ❚
par cure de redazion