E covente une altre Europe,
plui dongje de int, dai teritoris e des comunitâts
No son dome la Europe dai nazionaliscj antieuropeiscj che ur fasin cuintri al procès di integrazion e chê di chei che si podarès clamâju “euroconformiscj”, che a fevelin di unitât e di disvilup, ma no van plui innà dal “status quo” intergovernatîf, burocratic e economicist. Lis elezions pal Parlament European, che si son davueltis dai 23 ai 26 di Mai, a àn mostrât che a esistin ancje altris visions de Europe: par esempli chês fatis indenant dai Verts, che a nivel continentâl a figurin tra i vincidôrs di chestis elezions, o di chei partîts e moviments che si presentin tant che i interpretis plui autentics des dibisugnis, dai dirits e des rivendicazions des minorancis e des nazions cence stât e che par chel a son a pro de integrazion europeane e par chel a son critics viers des modalitâts che la stesse e ven puartade indenant de bande di guviers, di lobbies e di diplomaziis.
Tal gnûf parlament di Strasburc e Bruxelles il grup dai Verts e de Aleance Libare Europeane (ALE), là che si dan dongje ecologjiscj, regjonaliscj e nazionalitaris progressiscj, al varà setantecuatri eurodeputâts, ven a dî vincjedoi di plui de legjislature stade. Di chel grup, che al esist zaromai di vincj agns, daûr dai risultâts des urnis, a fasaran part, almancul fin ai 30 di Otubar, cuant che si previôt la “Brexit”, trê esponents dal Partît nazionâl scozês (SNP) – un di plui che dal 2014 al 2019 – e une dal Partît nazionâl galês (PC), la confermade europarlamentâr Jill Evans. Il lôr intindiment al è clâr: marcâ che il Gales e ancjemò cun plui fuarce la Scozie, là che si pense di fâ juste par chel un gnûf referendum popolâr, a àn chê di restâ inte Union Europeane, magari ancje fûr dal Ream Unît.
Altris components de ALE che a fasaran part di chel grup a son il cors François Alfonsi, la rapresentante de minorance russe in Letonie, Tatyana Zdanoka, e i trê elets inte coalizion dai progressiscj nazionalitaris catalans, bascs e galizians Ahora Republicas, a tacâ dal leader de Çampe Republicane di Catalogne (ERC), Oriol Junqueras, za vicepresident de Generalitat, che di passe un an e mieç al è in preson preventive par vie dal referendum indipendentist dal prin di Otubar dal 2017 e che cumò i judiçs di Madrid no i permetin di lâ a increditâsi tant che eurodeputât.
La cuistion, cemût che e denunzie ancje la presidente de ALE, Lorena López de Lacalle, e je plui politiche che juridiche e al somee une vore probabil che inte prime sentade dal Parlament European dai 2 di Lui Junqueras nol sarà tal so puest, là che lu àn mandât i siei eletôrs. Cundut dai risultâts des elezions europeanis, a son pal moment sieradis lis puartis di Strasburc e Bruxelles ancje par doi altris ex components dal guvier catalan che al à gjestît il referendum di doi agns indaûr, ven a dî il za president Carles Puigdemont e il za ministri pe sanitât Toni Comin. In esili te Belgjiche di in chê volte, si son candidâts pal Europarlament inte liste Lliures per Europa (Libars pe Europe) e in tancj di lôr ju àn votâts, cun chel stes intindiment che tancj altris a àn sielzût Junqueras: ricuardâ che ancje chê catalane e je une cuistion europeane e domandâ che si cjati une soluzion positive europeane.
Dopo de ande “pilatesche” di Comission e Consei tal 2017, al sarès ben che la UE e frontàs chest argoment cuntun altri ategjament. Magari cussì no, par cumò nol è cussì, cemût che a mostrin sedi il câs di Junqueras sedi lis gnovis dificoltâts di caratar aministratîf che a son saltadis fûr a Madrid e duncje a Strasburc e a Bruxelles pal increditament di Puigdemont e di Comin. Ancje dai fats dopo dal vôt, che al à confermât ancje la presince tal grup liberaldemocratic di Izaskun Bilbao dal Partît nazionalist basc (EAJ-PNV), al torne a saltâ fûr che e covente une altre Europe, che e sedi plui dongje de int, dai teritoris e des comunitâts e duncje che e sedi “plui europeane”. ❚
Marco Stolfo