Lezions in aule
e incuintris sul teritori dai 15 di Lui
Slargjâ la ufierte formative dal Ateneu pai students e l’orizont des cognossincis e des competencis dai fantats tacant de lenghe furlane e de culture dal Friûl. Cun chescj intindiments il Cirf-Centri Interdipartimentâl pal disvilup de lenghe e de culture dal Friûl de Universitât dal Friûl al inmanee une gnove session estive dai cors gratuits di lenghe e di culture furlane pai students universitaris e par ducj i zovins interessâts.
Ogni percors al sarà struturât in siet lezions, par un totâl di vincj oris. I prins sîs incuintris a saran di trê oris, intant che la ultime lezion, cuant che si fasarà l’esam finâl, e sarà di dôs oris. Un dai doi cors al scomençarà ai 15 di Lui e al larà indevant ogni lunis e ogni miercus fin ai 2 di Avost, des 3 e mieze dopomisdì aes 6 e mieze sore sere inte aule T1 dal Palaç Garzolini Di Toppo Wassermann (vie Glemone 92, a Udin); chel altri, invezit, si tignarà dai 2 ai 23 di Setembar, alternantsi tra Palaç Antonini Cernazai (vie Petracco 8, a Udin) e Palaç Garzolini Di Toppo Wassermann, simpri des 3 e mieze dopomisdì aes 6 e mieze sore sere.
Intal program dai cors, dongje dai elements di fonde di grafie e di gramatiche e di cualchi nozion di caratar storic e su la produzion culturâl, a vignaran presentâts i imprescj informatics che a son a disposizion par judâ inte scriture dai tescj par furlan e si fevelarà ancje des manifestazions e des ativitâts indreçadis ai zovins.
Ae fonde de iniziative e je la cussience dal fat che la cognossince de lenghe furlane e dal Friûl e zove ae capacitât di cognossi e di capî il mont, cuntun ategjament pardabon interculturâl e multidissiplinâr. Par cheste reson, ancje chest an il sproc che al è stât sielzût par promovi i cors al è “No stâ fâ il barbezuan. Impare il furlan”.
La ativitât e ven fate cu la colaborazion de ARLeF-Agjenzie Regjonâl pe Lenghe Furlane, de Societât Filologjiche Furlane e de cooperative Informazione Friulana/Radio Onde Furlane. In bande des lezions frontâls, a son in program ancje incuintris sul teritori, par esempli intes sedis de ARLeF e de Filologjiche e intai studis di Radio Onde Furlane.
Ducj i partecipants a varan un atestât di partecipazion. I fantats des scuelis superiôrs a podaran otignî il ricognossiment dai credits formatîfs pe ativitât extrascolastiche.
Informazions al numar 0432/556480 o scrivint a cirf@uniud.it o a sportel.furlan@uniud.it ❚
Redazion