Speciâi, ma no masse

A la fin e veve di lâ a finîle cussì. E sì, parcè che se no tu i crodis plui di tant in alc, no tu puedis pratindi che chei altris a ‘ndi crodin plui di te. E cussì il Ministri de Funzion Publiche, Renato Brunetta, al à sielzût ben la nestre Regjon par pandi il so intindiment di scancelâ lis Regjons a Statût Speciâl. E ducj là a sbregâsi vie i vistîts di intor e a sberlâ cuintri il Ministri e a dî che “la nestre Regjon e à di mantignî la specialitât, parcè che, parcè che… a proposit: parcè?”. I plui scaltris a àn tentât di tirâ fûr motivazions “furbis” (“cemût fasarìno a tignî bot a Austrie e Slovenie?, o ben: “o sin intal centri de Europe!”) o fantasiosis (“dome noaltris o podìn fermâ la imigrazion clandestine”): robute che e vâl par dutis o scuasit chês altris Regjons. La plui part dai sorestants, dut câs, e à nome sberghelât, o fat fente, cence rivâ a meti dongje un blec di spiegazion. La solite, rude maluserie.
Su chest cantin o ai di dî che noaltris autonomiscj o vin simpri vût une posizion clare e nete: lis resons origjinariis de specialitât a jerin il confin, la criticitât economiche e la presince di minorancis. Di chestis e je restade dome la ultime e su di chê e va ricostruide la specialitât, une specialitât fuarte, che nissun al podarà tocjâ parcè che si fonde (come par Sudtirôl e Val di Aoste) tes carateristichis linguistichis unichis di chest teritori, dulà che la maiorance de popolazion e parten a minorancis ricognossudis.
Propit pe insistence dai autonomiscj une olme di chestis ideis e jere stade metude dentri in sede de Riscriture dal Statût Speciâl fate buine dal Consei regjonâl stât, ma in forme une vore timide, cence convinzion e cun cualchi pericul. Di fat la prevision dal “plurilinguisim regjonâl” e veve domandât un sacrifici inacetabil pai furlans: il declassament de minorance furlane rispiet a chê slovene (par no cjacarâ de totâl assence dal Friûl te Cjarte regjonâl…). E chel al jere il miôr che si jere rivâts a gjavâ fûr dopo un an di bataiis, manifestazions, riunions, conferencis stampe, e v.i.
Po, no stin a dismenteâsi che nô furlans o sin chei furbons che tal ’48, vût de Costituente il Statût Speciâl, o vin pratindût (e otignût) di deventâ Regjon ordenarie par po tornâ, dopo 15 agns di ibernazion, a Statût Speciâl (par altri il mancul speciâl dai speciâi).
In sumis, stant cussì lis robis, o viôt za Brunetta che si sfreole lis mans.
LA “REGJON-SOT-DAL-PUINT”_Mês di feriis, mês di stradis plenis. Ma si rindìno cont di ce che e je deventade la A4 dopo de vierzidure dai confins a Soreli jevât? Di lunis a vinars la corsie di diestre e je pratichementri come un tren, cu la diference che ogni tant (anzit: ogni moment) cualchi vagon al decît di superâ chel altri vuadagnant la bielece di 3 seconts sul timp di percors!
Soluzion bipartisan dai sorestants: “Fasìn fâ la tierce corsie a un Super-comissari”. Ma sino sigûrs che e vali la pene, che chei beçonons a saran ben spindûts? (si sta cussì atents sul furlan, invezit co si fevele di oparis publichis, Diu nus vuardi!). Jo o pensi di no. La crisi energjetiche e fasarà lâ al mancul, voie o no, il traspuart su gome e il probleme dal trafic si pues risolvilu daurman in mût tant plui economic. Cemût? Midiant controi eletronics de velocitât su dute la autostrade, improibint pardabon il sorpàs ai TIRs, fasint paiâ pedaçs plui cjârs, metint plui pulizai su lis stradis. Za chest al spostarès part des marcjanziis sui trens.
E che no si tiri fûr, par slargjâ la A4, la storie de “Regione-ponte”: che se e continue cussì, a fuarce di TAV e tiercis corsiis o deventìn la “Regjon-sot-dal-puint”, che un pôc lu sin zaromai.
LA SCUELE E I PATRIARCJIS_Tal mês passât al è stât dut un tabaiâ de leç sul furlan e la Regjon, tra l’altri, e à fat savê che e intint gjavâ vie l’assintiment cidin (“silenzio-assenso”, par talian), ancje se la Cort e ves di dî che al è costituzionâl. Pecjât, però, che la gnove leç sul furlan… no previodi l’assintiment cidin. Tecnicamentri la norme e stabilìs un “dissens informât”: la scuele e je obleade a informâ par ben i gjenitôrs e in forme scrite e chescj, se no son dacuardi, a podaran dî di no. Chest al è une vore diferent di ce che si è fat crodi de stampe e al da ancje plui garanziis ai gjenitôrs de stesse leç 482/99, che no previôt ni informativis ni comunicazions scritis. Jo dut câs o resti une vore perplès su la opzion linguistiche, parcè che al è un sisteme che al divît i fruts, lis classis, lis fameis, in ultin la societât. Par frontâ l’insegnament dal furlan a scuele o varessin di svualâ plui adalt. A chest pro mi à parût une vore savi ce che al à dit sul teme l’arcivescul di Udin, Pietro Brollo: “Il furlan nol à di sei un probleme, ma un valôr che al va tutelât”.
Vino forsit di tacâ a vê nostalgjie dal podê temporâl dai patriarcjis?