I lavoradôrs austriacs, che fin in dì di vuê a podevin gjoldisi, in plui des domeniis, tredis zornadis di fieste ad an, cumò a puedin propit jessi contents. La Cort Europeane ur à dât une man cuntune sentence che e zonte une altre zornade di fieste. Di cumò indevant ducj i lavoradôrs, cence tignî cont des lôr crodincis religjosis, a varan dirit di vê une dì di fieste o une paie dople il Vinars Sant. Fin cumò chest al valeve dome pai evangjelics, pai metodiscj e pai vieris catolics (chei che si jerin distacâts tal 1871). Stant ae Cort Europeane, chest al jere discriminatori su fonde religjose e duncje – se propit e à di jessi une zornade di fieste – alore che e sedi par ducj, ancje pai ateus.
E cemût si fasial a no jessi dacuardi cu la Cort Europeane, se no altri par vie che une zornade libare di plui o une paie dople par ducj a spalanchin barcons cetant grancj ancje par nô talians, stant che o stin inte stesse Europe e sù par jù cui stes dirits. Cun di fat, i austriacs a àn za scomençât a domandâsi – ma o varessin di fâlu ancje nô – tropis religjons che a son di fat e tropis zornadis di fieste che e à ognidune. A spietin cun baticûr che ducj i lavoradôrs di cualsisedi religjon a domandin zornadis libaris pes lôr fiestis e, stant che la Cort Europeane e ricognossarà par ducj chest dirit, ca di cualchi an a saran plui zornadis di fieste che dîs di vore, come inte Rome antighe. In sumis, la Austrie e sarà plui indenant di ducj in Europe par chel che al tocje il multiculturalisim e la tolerance religjose, che a son aspiets là che cumò no je dal sigûr la prime.
Cheste e je fantapolitiche e nô – ben clâr – le vin butade sul ridi! Il guvier austriac, che si svante di tignî dut in strope, massime tal slargjâ la borse, nol à mai volût sintî a fevelâ di une altre zornade di feriis, che e costarès ae economie 600 milions di euros sù par jù. E dut chest, a dispiet di ce che a disin de lôr economie, cetant floride e che par chel e varès di garantî bielis jentradis cu lis tassis. Par scjinfâ une dì di feriis di plui, a vevin proponût di gjavâ il Corpus Domini – tant nissun al sa plui ce che al è – fasint fieste il Vinars Sant, tignût in bon di cetantis confessions. Dut câs, il guvier Kurz al à dit di volê rispietâ i indreçaments de Cort Europeane e al à burît fûr la soluzion: al à gjavât a ducj la fieste dal Vinars Sant e cussì nissun al podarà dî di jessi discriminât. Cui che al vûl al podarà domandâ une dì des feriis personâls, ma al varà di fâlu almancul trê mês prime; se però il datôr di lavôr al varà bisugne di lui in chê zornade, al podarà paiâlu come une altre zornade di fieste.
Si domandisi ae fin se e vâl la pene di movi dute cheste balfuerie, stant che pai lavoradôrs al cambie pôc, par vie che dut câs la plui part di lôr inte zornade di vinars e lavore dome fin a misdì. Nancje dî che i sindicâts, che il guvier ju à menâts ator ben e no mâl, a son cetant rabiôs: a vevin scomençât domandant la zornade interie invezit che mieze, e cumò ur e àn gjavade dal dut. Al somee un cjastì par chei che a àn pretindût di disviâ il guvier di robis plui penzis. ❚
Barbara Cinausero
