ATUALITÂT – La fuarce de volontât popolâr: il câs di Forgjarie

Cuarante agns fa, a Forgjarie, lis cjampanis a sunarin a plen par fâ fieste di sei tornâts sot de  provincie di Udin. Vuê che si cjacare de autodeterminazion di Puart e di Sapade che a vuelin tornâ te Patrie dal Friûl (cun tante fadie par vie de oposizion dal Venit), a è util riscuvierzi chest câs singolâr di vere democrazie «gjeopolitiche», in linie cu la volontât popolâr. Par un an, dal 1968 al 1969, Forgjarie – inte Diestre Tiliment – e fo part de gnove provincie di Pordenon, stant che e faseve part dal mandament di Spilimberc. Te sô storie, Forgjarie e à vût leams strents cui paîs dongje, massime cun Pinçan e Vît, che cun lôr e aministre ancjemò la Val di Arzin, un dai ultins ambients salvadis e cuntune grande biodiversitât de nestre regjon. Ma, tal stes timp, a son stâts fuarts i leams ancje cun Ruvigne e Sant Denêl li dongje, par no dî di Udin, diocesi che Forgjarie i fâs riferiment. Tal secont dopovuere, intant che Pordenon e cresseve cu la sô economie e e mostrave segnâi di indipendence, a Forgjarie al jere dut il contrari. Si ben che il sindic Giovanni Cedolini al ves fat documents comunâi in linie cu la volontât dai siei paisans, a Rome il parlament tal 1967 al faseve bon il progjet de provincie di Pordenon cun dentri dut il mandament dal Spilimberghês. Tal Otubar di chel an, dute la popolazion di Forgjarie e marcjave su Udin par pandi il so no a Pordenon. Nuie di fâ: la machine aministrative no si podeve plui fermâ. Il prin di Març dal 1968, a Pordenon e fo fieste grande pe nassite de gnove provincie, in gracie di une leç costitutive. Musis scuris invezit a Forgjarie. Ma i parlamentârs furlans de epoche a jerin za in vore par puartâ une modifiche significative ae leç. Un iter svelton, tant che ai 22 di Zenâr dal 1969 al fo spedît a Forgjarie un telegram di Rome cu la gnove che la Comission Internis de Cjamare dai deputâts e veve votât par tornâ sot de provincie di Udin. Cualchi setemane dopo, al fo il Senât a dî di sì, e cu la Vierte a Forgjarie a fiestezarin sunant a plen dutis lis cjampanis dal paîs. Forgjarie e fo cussì inseride tal mandament di Sant Denêl. Ancjemò vuê, cheste decision dal Parlament talian e cree un piçul paradòs viari: la strade provinciâl numar un di Pordenon, cognossude tant che la «Val di Arzin», plui o mancul par doi chilometris e cor in provincie di Udin tal paîs di Flavuigne, la uniche frazion di Forgjarie te bande drete dal riul Arzin.
Davide Francescutti