AI 32 DI MAI. Miôr vê une cjase o fâle sù?

Dopo «mame», «pa», «mandi» e «o ai di lâ a vore», la prime peraule che un furlan al impare a dî e je «cjase». La cjase e je scrite tal DNA dai furlans: le tegnìn tal cûr fin di piçui. Se tu viodis un frut che al met vie un pocje de paiute che al cjape di so pari e di sô mari, nol è par cjolisi un zûc o la biciclete: al è par meti sù cjase di grant. Nuie al è plui impuartant de cjase, par un furlan.
«Par fuarce», a disaran chei che a vegnin di fûr, «cun dut chel che al sglavine in Friûl, puar mai te se no tu âs un alc par taponâti il cjâf». E invezit no, no jentre nuie la ploie. La cjase e je il simbul stes de furlanetât: e je salde, sigure, e lasse jentrâ dome chei che e cognòs ben e ducj chei altris fûr. E soredut, ator di une cjase al è simpri alc ce fâ: netâle, comedâle, piturâle, mateâ tal curtîl.
La robe fondamentâl, par un furlan, nol è vê une cjase, ma fâle sù: il moment che dut il rest dal mont al fâs fieste, cuant che une cjase e je finide, cun ducj i mobii dentri e nuie altri di fâ che sentâsi a cjalâle, pal furlan al è un moment di avilizion: «e cumò ce aio di fâ? No mi tocjarà migo gjoldi?». Interorît di cheste prospetive, il furlan al cjate alc che nol va te cjase e al scomence a fâ: une cente par delimitâ miôr dulà che al scomence il gno e dulà che al finìs chel di chei altris, une magle tal mûr che tu âs di piturâ dut par parâle vie, e cuant che propite al va dut ben, al met sù un ort, che cun chel al varà simpri alc ce fâ.
E je une manie che e scomence di piçui. Cuant che o jeri frute, o vevi une vere fissazion nome par doi zûcs: dentri, i Lego, par fâ sù cjasis di bessole, e fûr in zardin o vie pai boscs, fâ sù cjasutis di ramaçs, cjanis garganis, fueis e dut chel che o cjatavi ator. «Ce biele cjasute», mi disevin gno pari e mê mari, «e cumò ce fâstu, zuistu li dentri cui tiei amiis?». Ma no po che no zuiavi! Finide di fâ sù une cjasute, a ’nt fasevi sù une altre! E dopo a nassevin ancje competizions cui amîs su cui che al veve la cjasute plui biele e plui grande.
Si, parcè che il furlan, cussì bon di cûr e cussì pôc atent ai dafâs di chei altris, cuant che si fevele di cjase al devente invidiôs. No in maniere triste, clâr, ma la invidie e salte fûr. E alore al scomence a cjalâ lis cjasis di chei altris, a rimirâlis, a pensâ ce mût fâ miôr o almancul compagn a cjase sô. Nol sarà migo un câs che la cjançon furlane plui cognossude di dutis e scomenci cun «O ce biel cjiscjel a Udin»?
BETE DI SPERE