FONDAZIONE FRIULI. Master sul cafè. Borse di studi par vivi une esperience formative uniche

Grandis pussibilitâts di formazion in gracie des borsis di studi sostignudis de Fondazione Friuli. Jenfri i tancj invistiments che e fâs sul teritori vie pal an, un di chescj al è rapresentât propit des borsis di studi che e finanzie par permeti ai students meritoris di vê cualchi pussibilitât in plui tal mont dal lavôr. Une di chestis e je chê che e diven de colaborazion cu la Fondazione Illy Caffè che za di un pâr di agns e inmanee il master in “Economie e sience dal cafè”, dedicât a Ernesto Illy. Si trate di un cors di studis, viert a di un massim di trente students che a rivin dal teritori regjonâl e talian midiant des colaborazions cu lis universitâts, ma ancje dai Paîs dulà che il cafè al ven produsût e che la Illy Caffè e à contats une vore impuartants. Tal stes timp, la Fondazione Illy e colabore cu lis Universitâts di Udin, di Triest e cu la Scuele internazionâl superiôr di studis avanzâts, Sissa, di Triest, ma ancje cui ents di alte formazion simpri dai Paîs produtôrs che a metin a disposizion i lôr docents, permetint cussì ai students di imparâ di personis une vore cualificadis.
«Il master – e spieghe Federica Miniussi de Fondazione Illy – si davuelç di Zenâr a Jugn e al è dividût in dodis modui: par ognidun di chescj, i students a àn di superâ un esam. Vie pal Istât a preparin une tesine che a Otubar a discutin cu la comission esaminadore. Il cors ur da une formazion complete che e partìs de coltivazion e de produzion agricule dal cafè fintremai ae sô trasformazion, cundut chel che al tocje la comercializazion, il marketing e ancje la sostignibilitât dal procès di produzion».
Si trate di un percors di studi che al à cierts coscj, viodude ancje la alte formazion che al ufrìs, ma fin cumò – e a son za un pâr di agns che la Fondazione Illy lu inmanee – il 98% di chei che lu àn seguît al à cjatât lavôr tal setôr. Di bande sô, la Fondazione Friuli ogni an e da la pussibilitât di partecipâ a un student meritevul paiant lis spesis (si fevele di 15 mil euros). Il student che al à vinçude la borse di studi al è Luca De Marchi, 33 agns, di Tisane, laureât in Agronomie ae Universitât Ca’ Foscari di Vignesie: «O ai partecipât al bant cuasi par câs, viodût che un amì mi veve segnalât – nus conte il zovin –. O scuen dî che chescj mês di studis a Triest a son stâts une esperience fondamentâl. O vin studiât tant, ma mi soi cjatât cun students di 14 Paîs dal mont e o ai imparât une vore di robis. Cun di plui, o ai vût ocasion di cognossi une grande aziende tant che la Illy».
De Marchi nol è un zovin che al à chê di lassâ il Friûl par fâ fortune tal mont: «Dopo che mi soi laureât – al zonte – o ai fat pratiche e po o ai fat l’esam di Stât par jessi agronom. O ai tacât po a lavorâ tal setôr in privât, e cuant che o ai savût di vê cjapade la borse di studi o ai fermât par 6 mês la ativitât par vie che no podevi pierdi une ocasion di cheste fate. No ai chê di lâ pal mont: o ai achì famee, morose, amîs. Al è clâr: il gno sium al sarès lavorâ pe Illy Caffè. Ma se nol sarà cussì, pazience: midiant di chest master o ai imparadis tantis robis che o podarai doprâ pal gno futûr». ❚
Piero Cargnelutti