Sfuei Mensîl Furlan Indipendent
Archivi de Patrie

LA INTERVISTE – Mario Collavino: Une bandiere furlane parsore il gnûf World Trade Center di New York

............
Mario Collavino

Là sù, sore dal gratecîl che al sarà il simbul de libertât e di rinassite de Americhe colpide dal terorisim, e svintularà un bandiere de Patrie. E simpri là sù, – ma di chê altre bande dal mont – lis cjampanis de tor di Muris a sunaran a fieste. Un dopli fîl al coleghe New York e Ruvigne, e al cûs dongje la storie di Mario Collavino, 77 agns, emigrât di zovin a Windsor, Ontario, tal Canadà. Cul fradi Rigo, al è stât fautôr di chê imprese dal modon che si clame «Collavino Construction Company». Che par 352,5 milions di dolars (cifre furnide dal sît web de societât comitente) si è garantide la costruzion dal complès plui impuartant e nomenât dal moment: la Freedom Tower, il gnûf World Trade Center.
Mario Collavino, la sô storie e scomence cuntune valîs in man. A podarès jessi la stesse di tancj dai nestris emigrants furlans.
Tai agns Cincuante, la Italie e jere ferme. Jo o vevi un barbe lât in Canadà tal 1948, che mi à clamât cun lui. Gno fradi Rigo al jere za là di un an. La veretât e jere che no volevi partî. O jeri peât ae mê tiere, al gno paîs. A Muris o jerin ducj tacâts: un par ducj e ducj par un. O ai patît un grum. Ma mi disevi: o voi e o torni, o fâs cinc agns e vonde… Invezit o soi tornât dopo siet agns e mi à fat impression. Il Friûl nol jere cambiât di cuant che o jeri lât vie, ma jo mi sintivi un pes fûr de aghe. O soi stât dôs, trê setemanis e po o soi tornât indaûr. Dentri di me no mi sei sintût mâl pal cambi di ategjament. Il Friûl al è simpri restât cun mê. Part de mê anime.

Une rapresentazion di cemût che e vegnarà la Freedom Tower di New York
Une rapresentazion di cemût che e vegnarà la Freedom Tower di New York

Dentri di chê valîs di emigrant, ce aial metût?
O stevin a Muris di Ruvigne. Di famee, o jerin contadins e o vevin i nestris problemis in timp di vuere. O mangjavin lidric e polente e polente e lat: ma e jere la vite di un «muran» di chê volte. Daspò la vuere, o soi lât a scuele fintremai ae cuinte elementâr; daspò o soi lât a Udin, a lavorâ. O jevavi aes cinc di buinore par cjapâ il tram a Sant Danêl. E o tornavi cjase aes cinc di sere, par po tornâ di gnûf a Sant Danêl, pe scuele serâl di disen. E je stade propit la mê formazion professionâl, il bagai plui impuartant che o ai puartât cun me. O ai imparât il mistîr e mi à dât la pussibilitât di sveâmi fûr e di vê la cognossince di cemût che a funzionin lis robis tal mont.
Chestis scuelis a àn formât schiriis di muradôrs preseâts tal mont. Altri che facoltâts di inzegnerie!
Par chest, il furlan tu lu viodis dapardut. In ogni cantîr. Prin di dut al è fuart, al è une raze di lavoradôr brâf, inteligjent, formât. Cualchi viaç a lavorin plui di ce che a pensin. Al è preseât, un trat distintîf e ricognossût.
Par esempli, tal so câs, cemût aial scomençât, une volte rivât a Windsor?
Corint daûr a une betoniere! Tal 1954, jo e gno fradi o vin scomençât cun piçui lavôrs… un blec di marcjepît, comedâ cualchi cjase… Ma o lavoravin simpri, ancje cence fermâsi di sabide. E propit la int di chel paisut, che cumò al è deventât un paison, e à scomençât a inacuarzisi di nô. E si à fat il salt des piçulis comessis aes grandis oparis: ospedâi, fabrichis, scuelis, e dopo o sin lâts indevant su chê strade, fassint robis simpri plui grandis. Lis fasevin ben e cun competence: cheste e je stade la nestre fortune.
Cuant si tachie a viodi a cressi pardabon la imprese dai Collavino?
Tra i ultins agns Sessante e i prins dai Setante. La nestre imprese e à cjapât comissions inte Gnove Scozie, tal Labrador, te Terranova, simpri in Canadà. Lavôrs considerâts jenfri i plui grancj e interessants de nazion. E po dopo, o sin rivâts in tancj paîs de Afriche (tra chescj, Camerun, Nigeria…), tal Orient di Mieç (Yemen, Emirâts Arabics), tal Sri Lanka. A jerin soredut lavôrs che a vignivin finanziâts dal guvier canadês, che nus veve viodût cemût che o lavoravin. Po o sin rivâts tai Stâts Unîts, dulà che o vin fat sù il «Marriott Hotel» di New York, il «Borgata Hotel Casino» di Atlantic City, e il «Renaissance Center» di Detroit, e in Florida.
La comesse plui impuartante però e je la ultime: Mario Collavino al è il costrutôr de Freedom Tower, prin edifici dal gnûf World Trade Center, a Ground Zero. Un simbul de Americhe post 11 di Setembar.
Mi cognossevin par chel che o vevi za fat. E o ai concorût ae selezion. O ai scugnût furnî un «résumé» des mês ativitâts. A volevin aciertâ che o fos net e che la mê imprese e fos nete. Ae fin, il «core», la struture puartant de Freedom Tower, le tirarà sù la mê imprese. Intai Stâts Unîts, e esist la figure dal «general» (une sorte di autoritât superiôr, ndr), che e à dividût in blocs i lavôrs di fâ, distribuintju. Par chest, simpri culì, o sin daûr a tratâ par altris lavôrs.

Muris
O stevin a Muris di Ruvigne. Di famee, o jerin contadins e o vevin i nestris problemis in timp di vuere.

Cemût si ise davuelte la tratative?
Le ai gjestide dute jo, prime di lâ in feriis. Po o ai lassât i miei doi fîs Renzo e Paolo, par sierâle. O ai cuatri fîs: Renzo, Lora, Cynthia e Paolo. I doi masclis, inzegnîrs, a gjestissin la imprese cun me. Si che duncje o jeri in Portugal. I mei fîs mi àn clamât par dî che la Port Authority di New York e New Jersey, la societât che e governe la opare, e domandave un sbassament dal presit. Si capìs, a saran stâts ancje un pôc spaurîts, ma jo al telefon o soi stât iremovibil: «Cjalait, fruts, tornait dentri e disêt che plui sot di chel impuart no podìn lâ». Ae fin, le vin vude vinte.
O imagjini la gjonde.
Lôr no crodevin. No savevin se ridi o vaî. Ma ju capìs: si trate di un lavôr impuartant, al è l’edifici di ponte dal gnûf World Trade Center! E po, la stesse New York e je une citât dificil.
Si sa che il progjet al è dal architet polac american Daniel Libeskind. Cuâl isal il stât dai lavôrs?
O vin fat lis fondis, che a rivin jù fintremai a 50 metris sot tiere, e par cumò o sin rivâts a tirâ sù la struture fintremai al plan teren. Podopo, o vin di costruî 108 plans. Il gratecîl al va sù par 1776 «pîts», un numar simbolic: al è l’an de firme de Costituzion americane. Il nestri cantîr al da lavôr a 300 operaris.
Si doprarano materiâi particolârs?
Dute la struture e je in ciment armât. E chest al è un aspiet interessant: si trate di un ciment speciâl, un dai plui fuarts e rigjits in ûs in Americhe, cun carateristichis di resistence e di compression.
Cuant si proviodial di finî?
O vevin di completâ il lavôr tal 2011. Ma nol sarà cussì: il tiermin al è spostât al 2013. Ma no je stade colpe nestre: la Port Authority no nus à consegnâts i progjets. Tal sens che al è stât cualchi probleme cui disens, che a son stâts ritocjâts par rindi plui fuarte la struture in largjece. E la crisi finanziarie che e à metût in zenoglon la Americhe, no à judât: dutis lis tratativis pe assegnazion di chei altris lavôrs de Freedom Tower a son stadis blocadis, e tornadis a inviâ dome di pôc.
Ce si provial a vê i voi dal mont intor?
You know al è un cantîr blindât dal Fbi e de polizie, cun controi antiesplosîfs e antiterorisim. No si puedin mostrâ i progjets a di nissun, ni rivelâ detais. Dut «top secret»: o ai vût firmâ ancje une clausule tal contrat. Dut câs, e je une sensazion strane, contrastante. Ma tu pensis ancje a ce che al è Ground Zero e ce che culì al è sucedût. Cuant che o butavin lis fondis, dispès o cjatavin ancjemò rescj umans: o vevin di blocâ dut e di clamâ la sigurece. Al è sadness… cemût si disie in marilenghe?
Aviliment. Ma o sarês stâts ancje braurôs de comesse!
Un grum. Massime par vie dal gno jessi furlan emigrant. Pensant di dulà che o soi partît. E di jessi rivât a chest nivel. Par chest, o speri di rivâ adore di fâ vignî la bande di Muris, cuant che o fasarìn il licôf. Parcè che in chê dì, su la gnove Freedom Tower, te downtown di New York, e svintularà ancje la bandiere dal Friûl.
Il Canadà al è nomenât par jessi un model te atuazion dal multiculturalisim. Duncje i domandi: si sintial plui canadês o plui furlan?
Mi sint ducj i doi insiemit. Il Friûl al è dulà che o soi nassût, il Canadà al rapresente ce che o soi deventât e ce che o ai fat. O soi braurôs di jessi furlan e canadês.
Oscar Puntel

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +